രാജ്യം സ്വാതന്ത്ര്യ ദിനമാഘോഷിക്കുന്ന വേളയിൽ തെലങ്കാന സൈബറാബാദ് മെട്രോപൊളിറ്റൻ പൊലീസിന്റെ പ്രത്യേക അതിഥിയായി മലയാളി സിനിമ താരം ദുൽഖർ സൽമാൻ. താരം തന്നെയാണ് വിഡിയോ സമൂഹമാധ്യമങ്ങളിലൂടെ പങ്കുവച്ചിരിക്കുന്നത്.
വെള്ള കുർത്തയും പാന്റ്സുമണിഞ്ഞ് സൺഗ്ലാസ് വച്ച് ഓപ്പൺ ജീപ്പിൽ കടന്നുവരുന്ന ദുൽഖറിന്റെ വിഡിയോ സമൂഹമാധ്യമങ്ങളിൽ പെട്ടെന്ന് തന്നെ വൈറലാവുകയും ചെയ്തു. പോസ്റ്റ് ചെയ്ത് മിനിറ്റുകൾക്കകം തന്നെ ആരാധകരുടെ അഭിനന്ദന പ്രവഹമായിരുന്നു.
ഈ അസുലഭ നിമിഷത്തിന് സൈബറാബാദ് മെട്രോപൊളിറ്റൻ പൊലീസിന് നന്ദിയെന്ന് ദുൽഖർ സൽമാൻ പോസ്റ്റിൽ കുറിച്ചു.
ഹൈദരാബാദിലെ ജൂബിലി ഹിൽസ് തെന്നിന്ത്യൻ താര ലോകത്തിന്റെ കേന്ദ്രമായിട്ടും മലയാളി താരം ദുൽഖർ സൽമാനെ സ്വാതന്ത്ര്യ ദിനത്തിൽ പതാക ഉയർത്താൻ ക്ഷണിച്ചതിന്റെ അഭിമാനത്തിലാണ് മലയാളികൾ.
