തിരുവനന്തപുരം: ബംഗാൾ ഉൾക്കടലിൽ രൂപപ്പെട്ട ഫിൻജാൽ ചുഴലിക്കാറ്റ് പോണ്ടിച്ചേരിയിൽ കര തൊട്ടതിന് പിന്നാലെ കേരളത്തിൽ മഴ ശക്തിപ്പെട്ടു. ഇന്നലെ തെക്കൻ ജില്ലകളിൽ ശക്തമായിരുന്ന മഴ ഇന്ന് മധ്യകേരളത്തിലേക്കും വടക്കൻ ജില്ലകളിലേക്കും വ്യാപിച്ചു. നാളെ വടക്കൻ ജില്ലകളിൽ കനത്ത മഴയ്ക്ക് സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രം ഞായറാഴ്ച ഉച്ചയ്ക്ക് പുറത്തു വിട്ട മഴ മുന്നറിയിപ്പ് പ്രകാരം നാളെ നാല് ജില്ലകളിൽ റെഡ് അലർട്ട് ആണ്.
ഇന്ന് കോട്ടയം, എറണാകുളം, ഇടുക്കി, തൃശ്ശൂർ ജില്ലകളിൽ ഓറഞ്ച് അലർട്ടാണ്. പത്തനംതിട്ട, ആലപ്പുഴ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്.
നാളെ മലപ്പുറം, കോഴിക്കോട്, വയനാട്,കണ്ണൂർ ജില്ലകളിൽ റെഡ് അലർട്ടാണ്. എറണാകുളം, ഇടുക്കി, തൃശ്ശൂർ,പാലക്കാട്,കാസർകോട് ജില്ലകളിൽ ഓറഞ്ച് അലർട്ടും പ്രഖ്യാപിച്ചിട്ടുണ്ട്. പത്തനംതിട്ട, ആലപ്പുഴ, കോട്ടയം ജില്ലകളിൽ യെല്ലോ അലർട്ടാണ്.
അതേസമയം ഇന്നലെ രാത്രി 10.30 നും 11.30 നും ഇടയിൽ മണിക്കൂറിൽ പരമാവധി 90 കിലോമീറ്റർ വേഗതയിലാണ് ഫിൻജാൽ ചുഴലിക്കാറ്റ് പുതുച്ചേരി തീരത്ത് കരയിൽ പ്രവേശിച്ചത്. കരയിൽ പ്രവേശിച്ചതിന് പിന്നാലെ അതി തീവ്ര ന്യുന മർദ്ദമായി ശക്തി കുറഞ്ഞ് ഫിൻജാൽ കരയിലൂടെ സഞ്ചാരം തുടരും എന്നാണ് കാലാവസ്ഥാ നിരീക്ഷണ കേന്ദ്രത്തിൻ്റെ പ്രവചനം.
