ആരോഗ്യമന്ത്രി വീണ ജോര്‍ജിന്റെ പേഴ്‌സണല്‍ സ്റ്റാഫിനെതിരെ നിയമനം വാഗ്ദാനം ചെയ്ത് പണം തട്ടിയെന്ന് പരാതി. ആയുഷ് മിഷന് കീഴില്‍ മലപ്പുറം മെഡിക്കല്‍ ഓഫീസറായി ഹോമിയോ വിഭാഗത്തില്‍ നിയമനം വാഗ്ദാനം ചെയ്താണ് ആരോഗ്യമന്ത്രിയുടെ പേഴ്‌സണല്‍ സ്റ്റാഫ് അംഗമായ അഖില്‍ മാത്യുവും സിഐടിയു പത്തനംതിട്ട ജില്ലാ മുന്‍ ഓഫീസ് സെക്രട്ടറി അഖില്‍ സജീവും പണം തട്ടിയതെന്നാണ് പരാതി.
ഹോമിയോ വിഭാഗത്തില്‍ താത്കാലിക നിയമനത്തിന് അഞ്ച് ലക്ഷവും സ്ഥിരപ്പെടുത്തുന്നതിന് 10 ലക്ഷവുമുള്‍പ്പെടെ 15 ലക്ഷവുമാണ് ഇരുവരും ആവശ്യപ്പെട്ടത്.
തിരുവനന്തപുരത്തെ ആരോഗ്യവകുപ്പ് ഓഫീസിന് സമീപത്്ത വെച്ച് അഖില്‍ മാത്യുവിന് ഒരു ലക്ഷം രൂപയും ഇടനിലക്കാരനായ അഖില്‍ സജീവിന് 50,000 രൂപ നേരിട്ടും 25000 രൂപ ബാങ്ക് മുഖേനയും നല്‍കിയെന്നാണ് പരാതിക്കാരന്റെ ആരോപണം.
നിയമനത്തിന് ആരോഗ്യവകുപ്പില്‍ അപേക്ഷ നല്‍കിയപ്പോള്‍ അഖില്‍ സജീവ് നിയമനം ഉറപ്പ് നല്‍കി തങ്ങളെ ഇങ്ങോട്ട് വിളിക്കുകയായിരുന്നുവെന്നും അദ്ദേഹം പറഞ്ഞു. മകന്റെ ഭാര്യയുടെ നിയമനത്തിനായാണ് പണം നല്‍കിയത്. ഭരണംമാറും മുമ്പ് നിയമനം സ്ഥിരപ്പെടുത്തുമെന്ന് ഉറപ്പ് നല്‍കിയതായും മലപ്പുറം സ്വദേശിയായ ഹരിദാസ് പരാതിയില്‍ പറയുന്നു.
അതേസമയം വിഷയം ചൂണ്ടിക്കാണിച്ച് ആരോഗ്യവകുപ്പിനും ആരോഗ്യമന്ത്രിക്കും പരാതി നല്‍കിയെങ്കിലും നടപടി ഉണ്ടായില്ലെന്നും ഹരിദാസ് ആരോപിച്ചു. എന്നാല്‍ അഖില്‍ മാത്യു പണം വാങ്ങിയിട്ടില്ലെന്നും അന്വേഷണത്തിനായി പരാതി ഡിജിപിക്ക് കൈമാറിയെന്നുമാണ് മന്ത്രിയുടെ ഓഫീസ് അറിയിച്ചത്.
