യുഎഇയിൽ എത്തുന്ന സഞ്ചാരികൾ ഒഴിവാക്കാൻ പാടില്ലാത്ത മനോഹരമായ ഒരിടമാണ് ക്ലൗഡ് ലോഞ്ച്. സമുദ്രനിരപ്പില്‍നിന്ന് 600 അടി മുകളിൽ സ്ഥിതിചെയ്യുന്ന ക്ലൗഡ് ലോഞ്ച് ഏതൊരു സഞ്ചാരിയുടേയും മനംകവരുന്ന കാഴ്ചയാണ് സമ്മാനിക്കുന്നത്. ‘പറക്കുംതളിക’ പോലെ തോന്നിക്കുന്ന ക്ലൗഡ് ലോഞ്ച് വാസ്തുവിദ്യയുടെ വിസ്മയക്കാഴ്ചയാണ് ഒരുക്കുന്നത്.
ഖോര്‍ഫക്കാനിലെ പ്രധാന വിനോദസഞ്ചാര കേന്ദ്രമായ ക്ലൗഡ് ലോഞ്ച് ആസ്വദിക്കാൻ ആയിരക്കണക്കിന് സന്ദര്‍ശകരാണ് എത്തുന്നത്. ഇവിടെ നിന്നാൽ യു.എ.ഇയുടെ കിഴക്കന്‍ തീരത്തിന്റെയും ഒമാന്‍ ഉള്‍ക്കടലിടുക്കിന്റെയും വിശാല കാഴ്ചകളും ആസ്വദിക്കാം. സന്ദര്‍ശകര്‍ക്ക് സുരക്ഷിതവും സൗജന്യമായും ക്ലൗഡ് ലോഞ്ച് കാഴ്ചകള്‍ ആസ്വദിക്കാനാകുമെന്നതാണ് ഇതിന്റെ ഏറ്റവും വലിയ പ്രത്യേകത. പര്‍വ്വത നിരകളുടെ സൗന്ദര്യംകൂടി ചേര്‍ന്ന ക്ലൗഡ് ലോഞ്ച് ഫോട്ടോഗ്രാഫി ഇഷ്ടപ്പെടുന്നവരുടെ പ്രധാന സ്ഥലമായി മാറികഴിഞ്ഞു.
