പാര്ട്ടിയില് തന്നെ പ്രകാശ് കാരാട്ടിന്റെ ഭാര്യ മാത്രമായി പരിഗണിച്ചുവെന്ന മലയാള മാധ്യമങ്ങളില് വന്ന വാര്ത്തയ്ക്കെതിരെ സിപിഎം പൊളിറ്റ് ബ്യൂറോ അംഗം ബൃന്ദ കാരാട്ട്. വാര്ത്തയുടെ തലക്കെട്ട് തീര്ത്തും കെട്ടിച്ചമച്ചതാണെന്നും താന് അത്തരത്തില് ഒരു കാര്യം എവിടെയും തന്റെ പുസ്തകത്തില് പറഞ്ഞിട്ടില്ലെന്നും ബൃന്ദ ഡല്ഹിയില് മാധ്യമങ്ങളോട് പറഞ്ഞു.
ഒരു സ്ത്രീ കമ്യൂണിസ്റ്റ് പാര്ട്ടിയില് ആയിരിക്കുമ്പോഴും മറ്റൊരു പാര്ട്ടിയില് ആയിരിക്കുമ്പോഴും ബഹുമാനിക്കപ്പെടുന്നതിന്റെ വ്യത്യാസവും പ്രധാന്യത്തെക്കുറിച്ചുമാണ് ആ ഭാഗത്തില് പറയുന്നത്. എനിക്ക് അത്തരമൊരു അനുഭവമില്ല. അവര് ആ തലക്കെട്ടില് പറയുന്നത് കെട്ടിച്ചമച്ചതാണ്. ഇത്തരത്തില് തലക്കെട്ട് നല്കുന്നത് ധാര്മികമല്ല,’ ബൃന്ദ കാരാട്ട് പറഞ്ഞു.
അതേസമയം വാര്ത്തയ്ക്കകത്ത് എന്താണ് പറഞ്ഞതെന്ന് തനിക്ക് അറിയില്ലെന്നും അത് താന് വായിച്ചിട്ടില്ലെന്നും അതുകൊണ്ട് അക്കാര്യത്തില് പ്രതികരണം നടത്തുന്നില്ലെന്നും ബൃന്ദ കാരാട്ട് പറഞ്ഞു. പുസ്തകം പൊതു ഇടത്തില് ലഭ്യമാണ്. ആര്ക്ക് വേണമെങ്കിലും അത് വായിച്ചു നോക്കാമെന്നും ബൃന്ദ കാരാട്ട് കൂട്ടിച്ചേര്ത്തു.
പാര്ട്ടിയില് തന്നെ പ്രകാശ് കാരാട്ടിന്റെ ഭാര്യ എന്ന രീതിയില് മാത്രം കണ്ടുവെന്നും സ്വതന്ത്ര വ്യക്തിത്വം അംഗീരിച്ചില്ലെന്നും പുസ്തകത്തില് പറയുന്നുണ്ടെന്ന രീതിയിലായിരുന്നു വാര്ത്ത. ഇതിനെതിരെയാണ് ബൃന്ദ കാരാട്ട് രംഗത്തെത്തിയത്.
