ഏക സിവില്‍ കോഡിനെ സ്വാഗതം ചെയ്തുകൊണ്ട് സോഷ്യല്‍മീഡിയയില്‍ പ്രചരിക്കുന്ന വാര്‍ത്തകള്‍ വ്യാജമെന്ന് സീറഓ മലബാര്‍ സഭ. ഏക സിവില്‍ കോഡുമായി ബന്ധപ്പെട്ട് പ്രതികരണമൊന്നും മാര്‍ ജോര്‍ജ് ആലഞ്ചേരി നടത്തിയിട്ടില്ലെന്ന് സീറഓ മലബാര്‍ സഭ പിആര്‍ഒ ഫാ. ഡോ. ആന്റണി വടക്കേക്കര വാര്‍ത്താകുറിപ്പില്‍ അറിയിച്ചു.
ഏക സിവില്‍കോഡ് നടപ്പാക്കുന്നത് രാജ്യത്തിന്റെ ഭദ്രതയ്ക്കും ജനങ്ങളുടെ ഐക്യത്തിനും ഉതകുന്നതാണെന്ന് മാര്‍ ജോര്‍ജ് ആലഞ്ചേരി പറഞ്ഞതായാണ് വാര്‍ത്തകള്‍ പ്രചരിച്ചത്. എന്നാല്‍ ഏക സിവില്‍ കോഡിനെ സഭ സ്വാഗതം ചെയ്തു എന്ന വിധത്തില്‍ പ്രചരിക്കുന്ന വാര്‍ത്ത തികച്ചും വാസ്തവ വിരുദ്ധമാണെന്നും സീറോ മലബാര്‍ സഭ വാര്‍ത്താക്കുറിപ്പില്‍ അറിയിച്ചു.
‘ഏകീകൃത സിവില്‍ കോഡിനെ സീറോമലബാര്‍സഭ സ്വാഗതം ചെയ്തു എന്ന വിധത്തില്‍ മേജര്‍ ആര്‍ച്ചുബിഷപ്പ് കര്‍ദിനാള്‍ മാര്‍ ജോര്‍ജ് ആലഞ്ചേരി പിതാവിന്റെ പേരില്‍ ഒരു വ്യാജവാര്‍ത്ത സാമൂഹ്യമാധ്യമങ്ങളില്‍ പ്രചരിക്കുന്നതായി ശ്രദ്ധയില്‍പ്പെട്ടു. ഈ വിഷയവുമായി ബന്ധപ്പെട്ട് യാതൊരു പ്രതികരണവും മേജര്‍ ആര്‍ച്ചുബിഷപ്പ് കര്‍ദിനാള്‍ മാര്‍ ജോര്‍ജ് ആലഞ്ചേരി പിതാവ് നടത്തിയിട്ടില്ലെന്നും ഇപ്പോള്‍ പ്രചരിക്കുന്ന വാര്‍ത്ത തികച്ചും വാസ്തവവിരുദ്ധവമാണെന്നും ഇതിനാല്‍ അറിയിക്കുന്നു,’ ഫാ.ഡോ. ആന്റണി വടക്കേകര വി.സി പറഞ്ഞു.
