അബുദാബിയിൽ ഗോൾഡൻ വിസ കാലാവധി 10 വർഷമാക്കി. അബുദാബി റസിഡന്റ്സ് ഓഫിസിന്റെ അഭ്യർഥനയെ തുടർന്നാണ് വിസ കാലാവധി ഏകീകരിച്ചതെന്ന് ഡയറക്ടർ മാർക്ക് ദോർസി അറിയിച്ചു. നേരത്തെ വ്യത്യസ്ത മേഖലകളിലെ വിദഗ്ധർക്കും ബിസിനസുകാർക്കും 5, 10 വർഷ കാലാവധിയുള്ള രണ്ട് ഇനം വിസകളായിരുന്നു നൽകിയിരുന്നത്. ഇതാണ് 10 വർഷമായി ഏകീകരിച്ചത്.
ഗോൾഡൻ വിസ ഉടമകളുടെ കുടുംബാംഗങ്ങൾക്ക് പ്രായഭേദമന്യേ തുല്യ കാലയളവിലേക്ക് വിസ കിട്ടും. മികച്ച വിദ്യാർഥികൾക്കും 5നു പകരം 10 വർഷത്തേക്ക് വിസ ലഭിക്കും.
വിസ നടപടിക്രമങ്ങൾ പൂർത്തിയാക്കാൻ ആറ് മാസത്തേക്ക് മൾട്ടിപ്പിൾ എൻട്രി വിസയും നൽകും. ഗോൾഡൻ വിസക്കാർക്ക് ആറ് മാസത്തിൽ കൂടുതൽ യുഎഇക്ക് പുറത്തു താമസിച്ചാലും വിസ റദ്ദാകില്ല. സ്പോൺസർ മരിച്ചാലും കുടുംബാംഗങ്ങൾക്ക് വിസാ കാലാവധി തീരുന്നതുവരെ രാജ്യത്ത് തുടരാം തുടങ്ങി നിരവധി ആനുകൂല്യങ്ങളുമുണ്ട്.
