അബ്രഹാമിക് ഫാമിലി ഹൗസ് വിശ്വാസികൾക്കായി തുറന്ന് കൊടുത്തു. വാരാന്ത്യത്തിൽ പള്ളിയിലേക്കും സിനഗോഗിലേക്കും ആദ്യ വിശ്വാസികളെ സ്വാഗതം ചെയ്തു. അബുദാബിയിലെ സാദിയാത്ത് ദ്വീപിലാണ് അബ്രഹാമിക് ഫാമിലി ഹൗസ് സ്ഥിതി ചെയ്യുന്നത്. ഫോറത്തിലേക്കുള്ള പ്രവേശനവും 2023 മാർച്ച് 1 മുതൽ സന്ദർശകർക്ക് ഗൈഡഡ് ടൂറുകളും ലഭ്യമാണ്. വിശ്വാസികൾ ടിക്കറ്റ് ബുക്ക് ചെയ്യേണ്ടതില്ല
അബ്രഹാമിക് ഫാമിലി ഹൗസിലെ ഏതെങ്കിലും മൂന്ന് ആരാധനാലയങ്ങളിൽ ഒരു സേവനത്തിലോ പ്രാർത്ഥനാ യോഗത്തിലോ കമ്മ്യൂണിറ്റി സമ്മേളനത്തിലോ പങ്കെടുക്കാം. നിങ്ങളുടേതല്ലാത്ത ഒരു വിശ്വാസത്തിന്റെ പ്രാർത്ഥനയിൽ പങ്കെടുക്കാൻ ആഗ്രഹിക്കുന്നുണ്ടെങ്കിൽ അതിഥിയായി പങ്കെടുക്കാൻ അവസരമുണ്ടെന്ന് അധികൃതർ അറിയിച്ചു.
കഴിഞ്ഞയാഴ്ചയാണ് അബ്രഹാമിക് ഫാമിലി ഹൗസ് ഉദ്ഘാടനം ചെയ്തത്. ഉപപ്രധാനമന്ത്രിയും ആഭ്യന്തര മന്ത്രിയുമായ ലെഫ്റ്റനന്റ് ജനറൽ ഷെയ്ഖ് സെയ്ഫ് ബിൻ സായിദ് അൽ നഹ്യാനും സഹിഷ്ണുതയുടെയും സഹവർത്തിത്വത്തിന്റെയും മന്ത്രി ഷെയ്ഖ് നഹ്യാൻ ബിൻ മുബാറക് അൽ നഹ്യാനും ചേർന്നായിരുന്നു ഫെബ്രുവരി 16 ന് ഉദ്ഘാടനം നിർവഹിച്ചത്.
