31-ാമത് അറബ് ലീഗ് ഉച്ചകോടി അൾജീരിയയിൽ നടന്നു. സമാധാനം, വീണ്ടെടുപ്പ്, സമൃദ്ധി എന്നതാണ് യുഎഇയുടെ മുദ്രാവാക്യമെന്ന് അറബ് ലീഗ് ഉച്ചകോടിയെ അഭിസംബോധന ചെയ്തുകൊണ്ട് യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം പറഞ്ഞു. പ്രാദേശികവും അന്തർദേശീയവുമായ വെല്ലുവിളികളെ അഭിമുഖീകരിക്കുന്നതിൽ യുഎഇ ഒരു പ്രധാന പങ്ക് വഹിക്കുന്നുണ്ടെന്നും അദ്ദേഹം കൂട്ടിചേർത്തു.
അന്താരാഷ്ട്ര നിയമങ്ങൾ, സമ്പദ്വ്യവസ്ഥ, സുസ്ഥിര വികസനം, നൂതന സാങ്കേതികവിദ്യ, ശാസ്ത്ര ഗവേഷണം എന്നീ മേഖലകളിലെ സഹകരണവും ‘സമാധാനം, വീണ്ടെടുക്കൽ, സമൃദ്ധി’ എന്ന മുദ്രാവാക്യം പ്രചരിപ്പിക്കുന്നതുമാണ് യുഎഇയുടെ പ്രധാന ലക്ഷ്യം. സംഘർഷ ഇടങ്ങളിലെ സമാധാനപരമായ ഇടപെടലുകൾക്കും സ്ത്രീ ശാക്തീകരണത്തിനും നൂതന സാങ്കേതിക വിദ്യയുടെ സാധ്യതകൾ പ്രയോജനപ്പെടുത്തുന്നതിനുമാണ് യുഎഇ മുൻഗണന നൽകുന്നതെന്നും ദുബായ് ഭരണാധികാരി ഉച്ചകോടിയിൽ വ്യക്തമാക്കി.
