കോഴിക്കോട്: ഔദ്യോഗിക പ്രഖ്യാപം വന്നില്ലെങ്കിൽ കോൺഗ്രസ് മത്സരിച്ചു പോരുന്ന ബേപ്പൂർ സീറ്റിൽ നിലമ്പൂർ മുൻ എംഎൽഎ പിവി അൻവർ മത്സരത്തിന് ഇറങ്ങുമെന്ന് ഉറപ്പായി. തൃണമൂൽ കോൺഗ്രസ് ചിഹ്നത്തിൽ യുഡിഎഫ് സ്ഥാനാർത്ഥിയായി അൻവർ ബേപ്പൂരിൽ മത്സരിക്കും. കഴിഞ്ഞ ദിവസം മുതൽ അൻവർ ബേപ്പൂരിൽ സജീവമായി ഇറങ്ങിയിട്ടുണ്ട്.
പ്രധാന യുഡിഎഫ് നേതാക്കളെയെല്ലാം അൻവർ നേരിൽ കാണുന്നുണ്ട്. മുസ്ലീം ലീഗിൻ്റേയും കോൺഗ്രസിൻ്റേയും നേതാക്കളെ അദ്ദേഹം നേരിൽ കണ്ടു. മണ്ഡലത്തിലെ സമുദായ നേതാക്കളേയും സന്ദർശിച്ചു ബേപ്പൂരിലെ സാഹചര്യം നേരിട്ടറിയാനാണ് എത്തിയത് എന്നാണ് അൻവറിനോട് അടുത്ത വൃത്തങ്ങളുടെ വിശദീകരണം. സിപിഎം കോട്ടയായ ബേപ്പൂരിൽ നിലവിൽ പൊതുമരാമത്ത് മന്ത്രി പി.എ മുഹമ്മദ് റിയാസാണ് എംഎൽഎ. റിയാസിനെതിരെ മത്സരിച്ച് കൊണ്ട് പിണറായിയെ നേരിട്ട് വെല്ലുവിളിക്കുക എന്നതാണ് അൻവറിൻ്റെ നീക്കം.
യുഡിഎഫ് നേതൃത്വത്തോട് മൂന്ന് സീറ്റുകളാണ് അൻവർ ചോദിച്ചത്. സജി മഞ്ഞക്കടമ്പന് വേണ്ടി പൂഞ്ഞാറും നിസാർ മേത്തറിന് വേണ്ടി തൃക്കരിപ്പൂരും ആണ് ചോദിച്ചത്. ബേപ്പൂർ കൂടാതെ അധിക സീറ്റ് നൽകുന്നതിൽ യുഡിഎഫ് നേതൃത്വം ഇതുവരെയും അൻവറിന് ഉറപ്പ് നൽകിയിട്ടില്ല.
