കേന്ദ്രവിഹിതം നല്‍കുന്നില്ലെന്ന സംസ്ഥാന സര്‍ക്കാരിന്റെ ആരോപണത്തിനെതിരെ കേന്ദ്രമന്ത്രി നിര്‍മല സീതാരാമന്‍. കേരളം കൃത്യമായ പ്രൊപ്പോസല്‍ നല്‍കാത്തതിനാലാണ് വിഹിതം നല്‍കാത്തതെന്ന് നിര്‍മാല സീതാരാമന്‍ തിരുവനന്തപുരത്ത് പറഞ്ഞു.
രണ്ട് തവണ ആവശ്യപ്പെട്ടെങ്കിലും മറുപടി തന്നില്ലെന്നും കേന്ദ്രമന്ത്രി പറഞ്ഞു. ആറ്റിങ്ങലില്‍ വായ്പ വ്യാപന മേള ഉദ്ഘാടനം ചെയ്ത് സംസാരിക്കുകയായിരുന്നു അവര്‍. 6015 കോടിയുടെ വായ്പ സഹായമാണ് തലസ്ഥാനത്തിന് അനുവദിച്ചിട്ടുള്ളത്.
കേന്ദ്ര ഫണ്ട് സംബന്ധിച്ച് സംസ്ഥാനത്ത് തെറ്റായ പ്രചാരണമാണ് നടക്കുന്നത്. സംസ്ഥാനങ്ങളുടെ കേന്ദ്ര വിഹിതത്തിനായി കൃത്യമായ പ്രപ്പോസല്‍ സമര്‍പ്പിക്കാന്‍ ധനകാര്യ വകുപ്പിനോട് ആവശ്യപ്പെട്ടിട്ടുണ്ടെന്നാണ് മന്ത്രി അറിയിച്ചത്. കേന്ദ്ര വിഹിതം കിട്ടിയതിന് ശേഷം കേരളം പദ്ധതികളുടെ പേരുകള്‍ മാറ്റുകയാണെന്നും മന്ത്രി പറഞ്ഞു.
വിധവ-വാര്‍ധക്യ പെന്‍ഷനുകള്‍ക്ക് ആവശ്യമായ തുക നല്‍കുന്നില്ല എന്നാണ് പ്രചാരണം. എല്ലാ സംസ്ഥാനങ്ങള്‍ക്കും കൃത്യമായ സമയത്ത് പണം നല്‍കുന്നുണ്ട്. ഒക്ടോബര്‍ വരെയുള്ള എല്ലാ അപേക്ഷകള്‍ക്കും ഉള്ള തുക നല്‍കിയിട്ടുണ്ട്. അതിന് ശേഷം ഒരു അപേക്ഷയും നല്‍കിയിട്ടില്ല. യഥാര്‍ത്ഥ വസ്തുത ജനങ്ങള്‍ അറിയാനാണ് ഇക്കാര്യം പറയുന്നതെന്നും മന്ത്രി പറഞ്ഞു.
പണം കിട്ടാന്‍ കാലതാമസം നേരിടേണ്ടി വന്നിട്ടുണ്ടെങ്കില്‍ അത് സംസ്ഥാനം ഫയലുകളില്‍ വരുത്തിയ കാലതാമസം ആണെന്നും മന്ത്രി കൂട്ടിച്ചേര്‍ത്തു.
നെല്ല് സംഭരിച്ചതിന്റെ പണം സംസ്ഥാന സര്‍ക്കാര്‍ കര്‍ഷകരുടെ അക്കൗണ്ടിലേക്ക് നല്‍കണം എന്നും കേന്ദ്ര സര്‍ക്കാര്‍ അങ്ങനെയാണ് ചെയ്യുന്നതെന്നും മന്ത്രി പറഞ്ഞു.
