കേരളത്തില് അനുവദിച്ച വന്ദേഭാരത് എക്സ്പ്രസ് ടെയിനുകള്ക്ക് തിരൂരില് സ്റ്റോപ്പ് അനുവദിക്കണമെന്ന ഹര്ജി തള്ളി സുപ്രീം കോടതി. സ്റ്റോപ്പ് തീരുമാനിക്കേണ്ടത് സുപ്രീം കോടതി അല്ലെന്നും റെയില്വേ ആണെന്നും ചീഫ് ജസ്റ്റിസ് ഡി.വൈ ചന്ദ്രചൂഡ് പറഞ്ഞു.
ഒരു ഹര്ജി അനുവദിച്ചാല് പല വന്ദേഭാരത് ട്രെയിനുകളുടെ ഹര്ജിയും കോടതിയില് എത്തും. അതിനാല് ഇപ്പോള് പോകുന്ന പോലെ ട്രെയിന് പോകട്ടെയെന്നും ചീഫ് ജസ്റ്റിസ് വ്യക്തമാക്കി. മലപ്പുറം തിരൂര് സ്വദേശിയായ പി.ടി ഷിജീഷ് ആണ് സുപ്രീം കോടതിയില് ഹര്ജി ഫയല് ചെയ്തത്. അഭിഭാഷകരായ ശ്രീറാം പറക്കാട്, എം എസ് വിഷ്ണു ശങ്കര് എന്നിവരാണ് ഹാജരായത്.
രാഷ്ട്രീയ കാരണങ്ങള് കൊണ്ടാണ് സ്റ്റോപ്പ് അനുവദിക്കാത്തതെന്നായിരുന്നു പരാതിക്കാരന്റെ വാദം. തിരൂരിന് സ്റ്റോപ്പ് അനുവദിക്കണമെന്ന് ആവശ്യപ്പെട്ട് നേരത്തെ കേരള ഹൈക്കോടതിയില് ഹര്ജി സമര്പ്പിച്ചിരുന്നെങ്കിലും ഇത് തള്ളിയിരുന്നു. തുടര്ന്നാണ് ഷിജീഷ് സുപ്രീം കോടതിയെ സമീപിച്ചത്.
കേരളത്തിലെ ഏറ്റവും ജനസാന്ദ്രതയുള്ള സ്ഥലമാണ് മലപ്പുറമെന്നും ജില്ലയിലെ റെയില്വേ സ്റ്റേഷനില് സ്റ്റോപ്പിന് അവകാശമുണ്ടെന്നുമായിരുന്നു വാദം. ആദ്യം റെയില്വേ പുറത്തിറക്കിയ ടൈം ടേബിള് പ്രകാരം വന്ദേഭാരത് എക്സ്പ്രസിന് തിരൂരില് സ്റ്റോപ്പ് അനുവദിച്ചിരുന്നുവെന്നും എന്നാല് ഇത് പിന്നീട് ഒഴിവാക്കുകയായിരുന്നുവന്നും ഇയാള് സുപ്രീം കോടതിയില് നല്കിയ ഹര്ജിയില് പറയുന്നു.
