ദുബൈ: റോബിൻ രാധാകൃഷ്ണനെ നായകനാക്കി ഒരു സിനിമ ഒരിക്കലും ചിന്തിച്ചിരുന്നില്ലെന്ന് പ്രൊഡക്ഷൻ കണ്ട്രോളറും നിർമ്മാതാവുമായ ബാദ്ദുഷാ വ്യക്തമാക്കി. എഡിറ്റോറിയലിന് നൽകിയ പ്രത്യേക അഭിമുഖത്തിലാണ് അദ്ദേഹം പറഞ്ഞത്.
എൻ്റെ ഉടമസ്ഥതയിലുള്ള മാറ്റ്നി എന്ന ഓണ്ലൈൻ പ്ലാറ്റ്ഫോമിൽ ബിഗ് ബോസ് നാലാം സീസണിലെ മത്സരാർത്ഥികളെ വച്ച് ഒരു അഭിമുഖപരിപാടി നടത്തിയിരുന്നു. ഇതിനായി ഞാൻ റോബിനെ വിളിച്ചിരുന്നു. അങ്ങനെയാണ് റോബിനെ പരിചയപ്പെടുന്നത്. പിന്നീട് റോബിൻ എൻ്റെ വീട്ടിൽ വരികയും എന്നെ നേരിൽ കാണുകയുമൊക്കെ ചെയ്തു. എന്നാൽ ഒരിക്കലും ഒരു റോബിനെ വച്ചൊരു സിനിമ ഞാൻ ആലോചിച്ചിട്ടില്ല. അങ്ങനെയൊരു പ്രൊജക്ടുമില്ല. എന്നാൽ അങ്ങനെയൊരു വാർത്ത വ്യാപകമായി പ്രചരിക്കപ്പെട്ടു – ബാദ്ദുഷാ പറഞ്ഞു.
ബിഗ് ബോസ് നാലാം സീസണിൽ നിന്നും പുറത്താക്കപ്പെട്ട ഡോ.റോബിൻ രാധാകൃഷ്ണനെ നായകനാക്കി ബാദ്ദുഷാ സിനിമ നിർമ്മിക്കുന്നതായി ഒരു ഘട്ടത്തിൽ വാർത്ത വന്നിരുന്നു. ഒരു സൂപ്പർതാര ചിത്രത്തിൽ വില്ലൻ വേഷത്തിൽ റോബിൻ വരുമെന്നും പിന്നീട് വാർത്ത വന്നു. ഡിആർആർ പ്രൊഡക്ഷൻ എന്ന പേരിൽ സ്വന്തം നിർമ്മാണ കമ്പനി തുടങ്ങുമെന്നും സ്വയം നായകനായി ചിത്രങ്ങൾ നിർമ്മിക്കുമെന്നും ഡോ.റോബിൻ പിന്നീട് വ്യക്തമാക്കിരുന്നു.
സ്വന്തം നിർമ്മാണ കമ്പനിയുടെ പ്രൊഡക്ഷനിലുള്ള റോബിൻ്റെ ചിത്രത്തിൻ്റെ ഫസ്റ്റ് ലുക്ക് പോസ്റ്ററും പിന്നീട് പുറത്തു വന്നു. രണ്ട് കൈയിലും വാച്ച് കെട്ടി നിൽക്കുന്ന റോബിൻ്റെ ചിത്രമായിരുന്നു പോസ്റ്ററിലുണ്ടായിരുന്നത്. രാവണയുദ്ധം എന്നാണ് ഈ സിനിമയ്ക്ക് പേരിട്ടത്. ഒരു വാച്ച് കഥാപാത്രത്തിന് സ്വന്തം സമയം നോക്കാനും മറ്റേ വാച്ച് വില്ലൻ്റെ സമയം നോക്കാനുമാണ് എന്നായിരുന്നു റോബിൻ വിശദീകരിച്ചത്. ഈ ചിത്രം സംവിധാനം ചെയ്യുന്നതും റോബിനാവും എന്നാണ് പോസ്റ്ററിൽ നിന്നും വ്യക്തമാവുന്നത്. എന്നാൽ മാസങ്ങൾക്ക് മുൻപ് പുറത്തു വന്ന ഈ പോസ്റ്ററിനെക്കുറിച്ചോ ഈ സിനിമയെക്കുറിച്ചോ പിന്നീട് വിവരങ്ങളൊന്നും പുറത്തുവന്നിട്ടില്ല.
View this post on Instagram
