എഡിറ്റോറിയലിന്റെ അമ്മയ്ക്കൊപ്പം ക്യാംപയിനിന്റെ ഭാഗമായി അഞ്ച് അമ്മമാര് അബുദാബിയില് എത്തി. മക്കളെ കാണാന്, മക്കള് ജോലി ചെയ്യുന്ന പ്രവാസ നഗരം കാണാന് വെള്ളിയാഴ്ച രാത്രി അബുദാബി സമയം 11.05 നാണ് അമ്മമാര് വിമാനമിറങ്ങിയത്. എയര്പോര്ട്ടില് സ്വീകരിക്കാന് മക്കളും എത്തിയിരുന്നു. മക്കളെ കണ്ട നിമിഷം ഉമ്മമാര് വികാരഭരിതരായി. സ്നേഹവും സന്തോഷവും കൊണ്ട് ഉമ്മമാരും മക്കളും പരസ്പരം പുണര്ന്നു.
ദുബായില് ജോലി ചെയ്യുന്ന ഫായിസിന്റെ ഉമ്മ മൈമൂന, റഫീഖിന്റെ ഉമ്മ ബീപാത്തുമ്മ, റാഷിദിന്റെ ഉമ്മ റഷീദ ബീവി ഹംസത്തിന്റെ ഉമ്മ ആസിയ ജസീലിന്റെ ഉമ്മ സുഹ്റ എന്നിവരാണ് എഡിറ്റോറിയലിന്റെ അമ്മക്കൊപ്പം ക്യാംപയിന്റെ ഭാഗമായി യുഎഇയിലെത്തിയത്. ആദ്യമായാണ് അമ്മമാര് വിമാനത്തില് കയറുന്നതെന്ന പ്രത്യേകത കൂടിയുണ്ട് ഈ യാത്രയ്ക്ക്. വെള്ളിയാഴ്ച രാത്രി നെടുമ്പാശേരി വിമാനത്താവളത്തില് 8.35 ന്റെ വിമാനത്തിലാണ് ഉമ്മമാര് അബുദാബിയിലേക്ക് പറന്നത്.
അഞ്ച് ദിവസം മക്കളോടൊപ്പം ഉമ്മമാര് യുഎഇയില് ചിലവഴിക്കും. രണ്ട് ദിവസം അബുദാബിയില് ചെലവഴിക്കുന്ന ഉമ്മമാര് അബുദാബി ഗ്രാന്ഡ് മോസ്ക്, എമിറേറ്റ്സ് പാലസ് ഹോട്ടല്, ഹെറിട്ടേജ് വില്ലേജ് എന്നിവ സന്ദര്ശിക്കും.
ഈ ക്യാംപയിനില് എഡിറ്റോറിയലിനൊപ്പം അബുദാബി ഫ്രഷ് പാലസ് റസ്റ്റോറന്റ് കഞ്ഞിക്കടയുടെ ഉടമകളായ അസ്കറും അന്സാറും ചേരുന്നുണ്ട്. ഇവരുടെ പുതിയ കഞ്ഞിക്കടയുടെ ഉദ്ഘാടനം നിര്വഹിക്കുന്നത് ഈ അഞ്ച് ഉമ്മമാര് ആണ്. ഞായറാഴ്ച വൈകുന്നേരം ദുബായ് സമയം നാല് മണിക്കാണ് ഉദ്ഘാടനം നിര്വഹിക്കുന്നത്. രണ്ട് ദിവസം അബുദാബിയില് ചെലവഴിച്ച ശേഷം ഉമ്മമാരെ ദുബായിലെത്തിക്കും. മക്കളുടെ തൊഴിലിടങ്ങളും ഉമ്മമാര് സന്ദര്ശിക്കും.
