വന്ദേ ഭാരത് എക്‌സ്പ്രസ് ഫ്‌ളാഗ് ഓഫ് ചെയ്യുന്നതിനായി കേരളത്തിലെത്തുന്ന പ്രധാനമന്ത്രി നരേന്ദ്ര മോദിയ്‌ക്കെതിരായ ഭീഷണി സന്ദേശം വ്യാജമെന്ന് വ്യക്തമാക്കി പൊലീസ്. സംഭവത്തില്‍ കതൃക്കടവ് സ്വദേശി സേവ്യറിനെ പൊലീസ് അറസ്റ്റ് ചെയ്തു. കത്തില്‍ പേരുണ്ടായിരുന്ന ജോണിയുടെ അയല്‍വാസിയാണ് അറസ്റ്റിലായ സേവ്യര്‍.
ജോണിയുമായി ഉണ്ടായ വ്യക്തി വൈരാഗ്യമാണ് കത്തെഴുതാനുണ്ടായ സാഹചര്യമെന്ന് പൊലീസ് പറയുന്നു.കത്തിലൂടെ കൈയ്യക്ഷരം പരിശോധിച്ചതിലൂടെ ജോണിയല്ല കത്തെഴുതിയതെന്ന് പൊലീസിന് വ്യക്തമാവുകയായിരുന്നു.
ഏപ്രില്‍ 17നാണ് ബി.ജെ.പി ഓഫീസില്‍ പ്രധാനമന്ത്രിയ്ക്കെതിരായ ഭീഷണിക്കത്ത് ലഭിച്ചത്. എറണാകുളം സ്വദേശി ജോസഫ് ജോണ്‍ നടുമുറ്റത്തിന്റെ പേരിലാണ് ഭീഷണിക്കത്ത് വന്നത്. കത്ത് വന്ന ഉടനെ തന്നെ പൊലീസിന് കൈമാറിയിരുന്നതായി ബി.ജെ.പി വൃത്തങ്ങള്‍ അറിയിച്ചു. അതേസമയം പ്രധാനമന്ത്രി എത്തുന്ന സാഹചര്യത്തില്‍ സുരക്ഷ ഒരുക്കുന്നതില്‍ വീഴ്ചയുണ്ടായതായും ബിജെപി ആരോപിച്ചു.
എ.ഡി.ജി.പി കത്ത് ഇന്റലിജന്‍സിന് കൈമാറുകയും സംഭവത്തില്‍ പൊലീസും രഹസ്യാന്വേഷണ വിഭാഗവും അന്വേഷണം ആരംഭിക്കുകയും ചെയ്തു. ഇന്റലിജന്‍സ് മേധാവിയുടെ റിപ്പോര്‍ട്ടിലാണ് സുരക്ഷാ ഭീഷണി സംബന്ധിച്ച് വിവരങ്ങള്‍ രേഖപ്പെടുത്തിയിരിക്കുന്നത്.
രണ്ട് ദിവസത്തെ സന്ദര്‍ശനത്തിനായാണ് പ്രധാനമന്ത്രി നരേന്ദ്ര മോദി കേരളത്തിലെത്തുന്നത്. ഇതിന്റെ ഭാഗമായി സുരക്ഷാ ക്രമീകരണങ്ങള്‍ വിലയിരുത്തിക്കൊണ്ടും നിര്‍ദേശങ്ങള്‍ നല്‍കിയും ഇന്റലിജന്‍സ് മേധാവി ടി.കെ വിനോദ്കുമാര്‍ തയ്യാറാക്കിയ റിപ്പോര്‍ട്ടിലാണ് സുരക്ഷാ ഭീഷണിയെക്കുറിച്ച് പരാമര്‍ശമുള്ളത്. പോപ്പുലര്‍ ഫ്രണ്ട് നിരോധനത്തിന് ശേഷമുള്ള സാഹചര്യങ്ങള്‍ ഗൗരവത്തിലെടുക്കണമെന്നും റിപ്പോര്‍ട്ടില്‍ നിര്‍ദേശമുണ്ട്.
