റമദാൻ കാലത്ത് രാത്രികളിൽ വിനോദസഞ്ചാരികൾക്ക് താജ്മഹലിലേക്കുള്ള പ്രവേശനത്തിന് വിലക്കേർപ്പെടുത്തി. റമദാൻ കാലത്തേക്ക് മാത്രമായിരിക്കും വിലക്കുണ്ടാവുക. അതേസമയം പ്രദേശവാസികൾക്ക് തറാവീഹ് നമസ്കാരത്തിനായി സമീപത്തെ പള്ളിയിൽ എത്താനാകും. വിശ്വാസികൾക്ക്‌ റമദാനിലെ രാത്രി കാലങ്ങളിൽ 7.45 മുതൽ 11 വരെ കിഴക്കു ഭാഗത്തെ ഗേറ്റിലൂടെ പ്രവേശിക്കാനും പുറത്തുകടക്കാനും അനുമതിയുണ്ടെന്ന് ആർക്കിയോളജിക്കൽ സർവേ ഓഫ് ഇന്ത്യ അധികൃതർ അറിയിച്ചു.
അതേസമയം പ്രാർത്ഥനയ്ക്കായി താജ്മഹലിൽ എത്തുന്നവർ അവരുടെ പേര്, വീട്ടുവിലാസം, ആധാർ കാർഡ് നമ്പർ, ഫോൺ നമ്പർ, എന്നിവ ഗേറ്റിൽ നൽകണം. അതേസമയം എല്ലാ മാസവും പൗർണ്ണമിക്ക് മുൻപും ശേഷവുമുള്ള രണ്ട് വൈകുന്നേരങ്ങളിലും പൗർണ്ണമി രാത്രിയിലും വളരെ കുറച്ച് സന്ദർശകർക്ക്‌ വേണ്ടി സുപ്രീം കോടതി വിധി പ്രകാരം താജ്മഹൽ തുറന്ന് കൊടുക്കാറുണ്ട്.
