കുവൈറ്റ് കിരീടാവകാശി ഷെയ്ഖ് അഹമ്മദ് നവാഫ് അൽ-സബാഹ് വീണ്ടും പ്രധാനമന്ത്രിയായി ചുമതലയേറ്റു. നിലവില്‍ കാവല്‍ മന്ത്രിസഭയെ നയിക്കുന്നത് ഷെയ്ഖ് അഹമ്മദ് നവാഫാണ്. ഷെയ്ഖ് അഹമ്മദ് നവാഫിനെ പ്രധാനമന്ത്രിയായി വീണ്ടും ചുമതലപ്പെടുത്തി ഞായറാഴ്ച്ച അമീർ ഉത്തരവ് പുറപ്പെടുവിക്കുകയായിരുന്നു. അമീറിന്റെ ഉത്തരവിനെ തുടർന്ന് ഈ ആഴ്ച്ച തന്നെ മന്ത്രിമാരെ തെരഞ്ഞെടുത്തേക്കുമെന്നാണ് സൂചന.
മന്ത്രിമാരെ പ്രധാനമന്ത്രിയാണ് നാമനിര്‍ദേശം ചെയ്യുക. ദേശീയ അസംബ്ലിയില്‍ മന്ത്രിമാര്‍ക്കെതിരെ കുറ്റ വിചാരണ പ്രമേയം കൊണ്ടുവരാനുള്ള നീക്കത്തിനിടെ ഫെബ്രുവരി 23ന് സര്‍ക്കാര്‍ രാജി സമര്‍പ്പിക്കുകയായിരുന്നു. തുടർന്ന് പാര്‍ലമെന്റ് സമ്മേളനത്തില്‍ നിന്ന് സര്‍ക്കാര്‍ വിട്ട് നില്‍ക്കുകയും സഭാ നടപടികള്‍ തടസ്സപ്പെടുത്തുകയും ചെയ്തിരുന്നു. സര്‍ക്കാരും എംപിമാരും തമ്മിലുള്ള തര്‍ക്കത്തെ തുടര്‍ന്ന് രമ്യതയിലെത്താന്‍ കഴിഞ്ഞിരുന്നില്ല. പിന്നാലെ സര്‍ക്കാര്‍ രാജിവെക്കുകയായിരുന്നു. പുതിയ സര്‍ക്കാര്‍ രൂപീകരിക്കുന്നതോടെ രാഷ്ട്രീയ സ്ഥിരത വരുമെന്ന പ്രതീക്ഷയിലാണ് ഇപ്പോള്‍ കുവൈറ്റ്.
2022 ഒക്ടോബര്‍ 17നാണ് പ്രധാനമന്ത്രി ഷെയ്ഖ് അഹമ്മദ് നവാഫ് അൽ-സബാഹിന്റെ നേതൃത്വത്തില്‍ നിലവിലുള്ള മന്ത്രി സഭ അധികാരമേല്‍ക്കുന്നത്. മന്ത്രിസഭയില്‍ 11 പുതുമുഖങ്ങളും രണ്ട് വനിതകളും ദേശീയ അസംബ്ലിയിലേക്ക് വിജയിച്ച രണ്ട് എംപിമാരും ഉള്‍പ്പെട്ടിരുന്നു.
