ആമസോൺ പേയ്ക്ക് പിഴ ചുമത്തി റിസർവ് ബാങ്ക് ഓഫ് ഇന്ത്യ. പ്രീപെയ്ഡ് പേയ്മെൻ്റ് (പിപിഐ), ഉപഭോക്താവിൻ്റെ വിവരങ്ങൾ (കെവൈസി) എന്നിവയുമായി ബന്ധപ്പെട്ട വ്യവസ്ഥകൾ പാലിക്കാത്തതിനാണ് പിഴ. 3.06 കോടി രൂപ പിഴ ചുമത്തിയതായി ആർബിഐ അറിയിച്ചു. ഇ-കൊമേഴ്സ് പ്ലാറ്റ്ഫോം ആമസോണിൻ്റെ ഡിജിറ്റൽ പേയ്മെൻ്റ് സംവിധാനമാണ് ആമസോൺ പേ.
കെവൈസി നിബന്ധനകൾ പാലിക്കുന്നതിൽ പുറപ്പെടുവിച്ച നിർദ്ദേശങ്ങൾ ആമസോൺ പേ പാലിക്കുന്നില്ലെന്ന് ആർബിഐ പ്രസ്താവനയിൽ വ്യക്തമാക്കി. പിഴ ഒഴിവാക്കണമെങ്കിൽ നിർദ്ദേശങ്ങൾ പാലിക്കാത്തതിന് കാരണം കാണിക്കൽ നോട്ടീസ് നൽകാൻ ഇന്ത്യയിലെ ആമസോൺ പേയോട് ആർബിഐ നോട്ടീസിൽ ആവശ്യപ്പെട്ടിരുന്നു.
ആമസോൺ പേയുടെ മറുപടി തൃപ്തികരമല്ലാത്തതിനാൽ നിർദ്ദേശങ്ങൾ പാലിച്ചില്ലെന്ന കുറ്റം സാധുതയുള്ളതാണെന്ന നിഗമനത്തിലെത്തുകയായിരുന്നു. പോരായ്മകൾ പരിഗണിച്ചാണ് പിഴ ചുമത്തിയതെന്നും ആർബിഐ വ്യക്തമാക്കി. അതേസമയം കമ്പനിയും ഉപഭോക്താക്കളുമായി നടത്തിയിട്ടുള്ള ഏതെങ്കിലും ഇടപാടോ കരാറോ സാധുതയില്ലാത്തതെന്ന് അഭിപ്രായപ്പെടുന്നില്ലെന്നും ആർബിഐ കൂട്ടിച്ചേർത്തു.
