ശിവരാത്രി ആഘോഷങ്ങളുമായി ബന്ധപ്പെട്ട് സുരേഷ് ഗോപി എംപി നടത്തിയ പ്രസംഗമാണിപ്പോൾ സമൂഹമാധ്യമങ്ങളിൽ വൈറലാകുന്നത്. അവിശ്വാസികളോട് തനിക്ക് സ്നേഹമില്ലെന്നും വിശ്വാസികളുടെ അവകാശങ്ങളുടെ എതിരെ വരുന്നവരുടെ സർവനാശത്തിന് വേണ്ടി ശ്രീകോവിലിൽ പ്രാർഥിക്കുമെന്നുമുള്ള സുരേഷ് ഗോപിയുടെ വാക്കുകൾ വലിയ വിവാദമാണ് സൃഷ്ടിച്ചിരിക്കുന്നത്.
‘ലോകമെങ്ങുമുള്ള വിശ്വാസികളായ മനുഷ്യരെ ഞാൻ സ്നേഹിക്കും. എല്ലാ മതത്തിലെയും വിശ്വാസികളെ സ്നേഹിക്കും. അതേസമയം അവിശ്വാസികളോട് ഒട്ടും സ്നേഹമില്ലെന്ന് ഞാൻ ചങ്കൂറ്റത്തോടെ പറയും. വിശ്വാസികളുടെ അവകാശങ്ങൾക്ക് നേരെ വരുന്ന ഒരു ശക്തിയോടും പൊറുക്കാനാകില്ല. അങ്ങനെ വരുന്നവരുടെ സർവനാശത്തിനായി ഞാൻ ഈ ശ്രീകോവിലിന് മുന്നിൽ പ്രാർഥിക്കും. എല്ലാവരും അങ്ങനെ ചെയ്യണം. ആരെയും ഉപദ്രവിക്കാനല്ല നമ്മുടെ ഭക്തി. എന്നാൽ നമ്മുടെ ഭക്തിയെയും ഭക്തി സ്ഥാപനങ്ങളെയും നിന്ദിക്കുന്ന ഒരാൾ പോലും സമാധാനത്തോടെ നല്ല ജീവിതം ജീവിച്ച് ഈ ലോകത്ത് അവസാനിപ്പിക്കാൻ അന്തരീക്ഷം ഒരുങ്ങരുത്. ഞാൻ ആരെയൊക്കെയാണ് ഉദ്ദേശിച്ചതെന്ന്… അങ്ങനെ പറഞ്ഞാൽ രാഷ്ട്രീയമാകും. അതുകൊണ്ട് പറയുന്നില്ല.’ സുരേഷ്ഗോപിയുടെ വാക്കുകൾ.
