യു എ ഇ ആസ്ഥാനമായി പ്രവർത്തിക്കുന്ന അൽ അൻസാരി എക്സ്ചേഞ്ചിൻ്റെ ആറാമത് ഡ്രീം ഹോം വിൻ്റർ പ്രൊമോഷൻ ക്യാമ്പയിൻ വിജയിയെ പ്രഖ്യാപിച്ചു. പാകിസ്ഥാനി സ്വദേശിയായ മുഹമ്മദ് സർഫ്രാസ് ഖാൻ മുഹമ്മദ് സിദ്ദിഖ് ഖാനാണ് സമ്മാനത്തിന് അർഹനായത്. മൂന്ന് വർഷമായി ദുബായിലെ താമസക്കാരനും അൽ അൻസാരി എക്സ്ചേഞ്ചിൻ്റെ ഉപഭോക്താവുമാണ് സർഫ്രാസ്. 35,000 ദിർഹത്തിൻ്റെ ഭവനമാണ് വിജയിക്ക് ലഭിക്കുക. യു എ ഇ യിലെ പ്രമുഖ ഫോറിൻ എക്സ്ചേഞ്ച് ആൻഡ് വേൾഡ് വൈഡ് മണി ട്രാൻസ്ഫർ കമ്പനിയാണ് അൽ അൻസാരി എക്സ്ചേഞ്ച്.
കമ്പനിയുടെ മിർദിഫ് സിറ്റി സെൻ്റർ വഴി 831ദിർഹം അയച്ചാണ് സർഫ്രാസ് പ്രൊമോഷന് യോഗ്യത നേടിയത്. കൂടാതെ തെരഞ്ഞെടുത്ത രണ്ട് ഉപഭോക്താക്കൾക്ക് ഒരു ലക്ഷം ദിർഹവും ഒരു ഔഡി കാറും 12 സാംസങ് ഗാലക്സി 22 സ്മാർട്ട് ഫോണുകളുടെ പ്രൊമോഷനും വാഗ്ദാനം ചെയ്തിട്ടുണ്ട്. യു എ ഇ പൗരനായ സയീദ് അബ്ദുൾ റസാഖ് സയീദ് ഈസ അൽ മൻസൂരിയാണ് ഔഡി കാർ നേടിയത്. ഫിലിപ്പീൻസ് സ്വദേശികളായ മിസ്. മറിയ മസ്കറിന, ജെയ്സൺ ആൽഡോവർ എന്നിവർക്കാണ് ഒരു ലക്ഷം ദിർഹം സമ്മാനമായി ലഭിച്ചത്. ജനുവരി 10 നാണ് ദുബായ് സാമ്പത്തിക, ടൂറിസം വകുപ്പിൻ്റെയും അൽ അൻസാരി എക്സ്ചേഞ്ചിൻ്റെയും മുതിർന്ന പ്രതിനിധികളുടെ സാന്നിധ്യത്തിൽ അവസാന നറുക്കെടുപ്പ് നടന്നത്.
ഉപഭോക്താക്കൾക്ക് റിവാർഡുകളിലൂടെയും മൂല്യ വർദ്ധിത പ്രോഗ്രാമുകളിലൂടെയും ഇടപാടുകൾ മെച്ചപ്പെടുത്തുന്നതിന് വേണ്ടി മികച്ച രീതിയിൽ പ്രവർത്തിച്ചതിൻ്റെ ഫലമായാണ് ഡ്രീം ഹോം വിൻ്റർ പ്രൊമോഷൻ 2022 അസാധാരണമായ പങ്കാളിത്തത്തിന് സാക്ഷ്യം വഹിച്ചതെന്ന് അൽ അൻസാരി എക്സ്ചേഞ്ച് സി ഒ ഒ അലി അൽ നജ്ജാർ പറഞ്ഞു. കൂടാതെ യു എ ഇ യിലെ വിശ്വസ്തരായ ഉപഭോക്താക്കളെ അഭിനന്ദിക്കാനും തക്കതായ പ്രതിഫലം നൽകാനുമുള്ള അൽ അൻസാരി എക്സ്ചേഞ്ചിൻ്റെ ശ്രമങ്ങളുമാണ് ഈ പ്രൊമോഷനിലൂടെ ലക്ഷ്യമിടുന്നതെന്നും വിജയികളെ അഭിനന്ദിക്കുന്നുവെന്നും അദ്ദേഹം കൂട്ടിച്ചേർത്തു.
