ക്രിട്ടിക്സ് ചോയ്സ് അവാർഡ് 2023ലും തിളങ്ങി ആർആർആർ. ഗോൾഡൻ ഗ്ലോബിനു പിന്നാലെയാണ് എസ്.എസ്. രാജമൗലിയുടെ ആർആർആറിന് ക്രിട്ടിക്സ് ചോയ്സ് അവാർഡും ലഭിച്ചത്. മികച്ച വിദേശ ഭാഷാ ചിത്രം, മികച്ച ഗാനം എന്നിങ്ങനെ രണ്ട് പ്രധാന പുരസ്കാരങ്ങളാണ് ചിത്രം സ്വന്തമാക്കിയത്. അതേസമയം ഓസ്കർ ലക്ഷ്യമിട്ട് മുന്നേറുന്ന ചിത്രത്തിന് ക്രിട്ടിക്സ് ചോയ്സ് അവാർഡ് കൂടി ലഭിച്ചതോടെ അണിയറ പ്രവർത്തകരും ഇന്ത്യൻ സിനിമാ പ്രേമികളും വലിയ ആവേശത്തിലും പ്രതീക്ഷയിലുമാണ്.
അതേസമയം എവ്രിതിങ് എവ്രിവെയർ ഓൾ അറ്റ് വൺസ് ആണ് മികച്ച ചിത്രമായി തിരഞ്ഞെടുത്തത്. മികച്ച നടിയായി കേറ്റ് ബ്ലാങ്കെറ്റും (ടാർ), മികച്ച നടനായി ബ്രെൻഡൻ ഫ്രേസെറും (ദ് വേൽ), മികച്ച സംവിധായകനായി ഡാനിയൽ ക്വാന്–ഡാനിയൽ ഷീനെർടിനെയുമാണ് (എവ്രിതിങ് എവ്രിവെയർ ഓൾ അറ്റ് വൺസ്) തെരഞ്ഞെടുത്തത്. മികച്ച ഡ്രാമ സീരിസിനുള്ള പുരസ്കാരം ബെറ്റർ കോൾ സോൾ സ്വന്തമാക്കി.
മികച്ച സിനിമ, സംവിധായകന്, നടന് തുടങ്ങിയ 15 വിഭാഗങ്ങളിലാണ് ആർആർആർ മത്സരിക്കുന്നത്. എന്നാൽ ഗുജറാത്തി ചിത്രം ചെല്ലോ ഷോയാണ് ഇന്ത്യയുടെ ഔദ്യോഗിക ഓസ്കര് എന്ട്രി. ജനുവരി 24നാണ് ഓസ്കർ നോമിനേഷൻസ് പ്രഖ്യാപിക്കുക.
