ഇന്ത്യയുടെ 75 ആം സ്വാതന്ത്ര്യ ദിനത്തോടനുബന്ധിച്ച് കുവൈറ്റ് ഇന്ത്യൻ എംബസി ആഘോഷപരിപാടികൾ സംഘടിപ്പിക്കുന്നു. ‘ ആസാദി ക അമൃത് മഹോത്സവ് ‘ എന്ന പേരിൽ ഇന്ത്യയിൽ നടക്കുന്ന സ്വാതന്ത്ര്യ ദിനാഘോഷ പരിപാടികൾക്ക് സമാനമായ ആഘോഷങ്ങളുടെ ഉദ്ഘാടനം ഇന്ത്യൻ അംബാസിഡർ സിബി ജോർജ് നിർവഹിച്ചു.
ഒരാഴ്ച്ച നീണ്ടു നിൽക്കുന്ന പ്രത്യേകം ബസ് പ്രൊമോഷൻ സർവീസ് ക്യാമ്പയിനുകളും തുടങ്ങിയിട്ടുണ്ട്. ഇന്ത്യയും കുവൈറ്റും തമ്മിലുള്ള നയതന്ത്ര സൗഹൃദത്തിന്റെ 60ാം വാർഷിക ആഘോഷങ്ങളുടെ സമാപനം കൂടി ഇതിനോടൊപ്പം നടക്കും. ഒരു വർഷക്കാലമായി വിവിധ പരിപാടികളാണ് വാർഷികത്തിന്റെ ഭാഗമായി നടത്തിയിരുന്നത്. ഇന്ത്യൻ എംബസിയിൽ വച്ച് നടന്ന ചടങ്ങിൽ കുവൈറ്റ് വാർത്താ മന്ത്രാലയത്തിലെ ഫോറിൻ മീഡിയ വിഭാഗം മേധാവി മാസിൽ അൽ അൻസാരി മുഖ്യ അഥിതിയായി.
കുവൈറ്റിലെ വിവിധ ബിസിനസ്സ് ഗ്രൂപ്പുകളുടെയും സഹായത്തോടുകൂടി ആരംഭിക്കുന്ന ബസ് പ്രൊമോഷൻ ക്യാമ്പയിൻ അംബാസിഡറും വിവിധ രാജ്യങ്ങളുടെ നയതന്ത്ര പ്രധിനിധികളും പൗര പ്രമുഖരും ചേർന്ന് ഫ്ലാഗ് ഓഫ്‌ നടത്തി. 100 പബ്ലിക് ട്രാൻസ്‌പോർട് ബസ്സുകളാണ് ക്യാമ്പയിന്റെ ഭാഗമായി സർവീസ് ആരംഭിക്കുന്നത്. ഇന്ത്യൻ സ്വാതന്ത്ര്യ ദിനത്തിന്റെയും ഇന്ത്യ-കുവൈറ്റ് സൗഹൃദത്തിന്റെയും സന്ദേശങ്ങൾ ബസുകളിൽ ആലേഖനം ചെയ്തിട്ടുണ്ട്.
