രാജ്യത്ത് ഇന്ന് മുതൽ 5 ജി ഇന്റർനെറ്റ് സേവനങ്ങൾ ലഭ്യമാകും. പ്രധാനമന്ത്രി നരേന്ദ്ര മോദിയാണ് ഇന്ന് തെരഞ്ഞെടുത്ത നഗരങ്ങളില്‍ 5 ജി സേവനം അവതരിപ്പിക്കുന്നത്. ഡൽഹിയിലെ ഇന്ത്യ മൊബൈല്‍ കോണ്‍ഗ്രസ് 2022ൻ്റെ ആറാം പതിപ്പിലാണ് 5 ജി സേവനങ്ങൾ പ്രധാനമന്ത്രി ഉദ്ഘാടനം ചെയ്യുന്നത്.
5 ജി സേവനങ്ങള്‍ അടുത്ത രണ്ട് വര്‍ഷത്തിനുള്ളില്‍ രാജ്യം മുഴുവന്‍ വ്യാപിപ്പിക്കുമെന്ന് വാര്‍ത്താവിനിമയ മന്ത്രാലയം വ്യക്തമാക്കിയിട്ടുണ്ട്. പുതിയ സാമ്പത്തിക അവസരങ്ങളും സാമൂഹിക നേട്ടങ്ങളും 5 ജി രാജ്യത്ത് കൊണ്ടുവരുമെന്നാണ് പ്രതീക്ഷ. 2035 ഓടെ ഇന്ത്യയില്‍ 5ജി യുടെ സാമ്പത്തിക സ്വാധീനം 450 ബില്യണ്‍ ഡോളറിലെത്താനും സാധ്യത. സെപ്റ്റംബറിൽ ഇന്ത്യയിലെ എക്കാലത്തെയും വലിയ സ്‌പെക്ട്രം ലേലം നടന്നിരുന്നു. ഒരാഴ്ച്ച നീണ്ടു നിന്ന ലേലത്തില്‍ 40 റൗണ്ടുകളിലായി 1.5 ലക്ഷം കോടി രൂപയ്ക്ക് മുകളില്‍ ലേലം വന്നതിൽ മൊത്തം 51.2 GHz സ്‌പെക്ട്രം വിറ്റഴിച്ചിരുന്നു.
