മൂന്ന് പേരടങ്ങിയ സംഘം സുഹൃത്തിനെ കുത്തുന്നത് തടയാന് ശ്രമിച്ച യുവാവ് അക്രമി സംഘത്തിന്റെ കുത്തേറ്റ് മരിച്ചു. മലപ്പുറം കുഴിയംപറമ്പ് ചര്ച്ചിന് സമീപം താമസിക്കുന്ന പുന്നക്കോടന് ചന്ദ്രന്റെ മകന് പ്രജിത്ത് ആണ് മരിച്ചത്. 26 വയസായിരുന്നു.
കുത്തേറ്റ സുഹൃത്ത് മെഡിക്കല് കോളേജ് ആശുപത്രിയില് ചികിത്സ തേടി. കുഴിയംപറമ്പ് വിസപ്പടിയിലെ പാറക്കടത്ത് പൊക്കനാളി നൗഫലിനാണ് കുത്തേറ്റത്. സംഭവത്തില് എടവണ്ണ, പൂക്കൊളത്തൂര് സ്വദേശികളായ രണ്ട് പേരെ പൊലീസ് കസ്റ്റഡിയില് എടുത്തിട്ടുണ്ട്.
ഞായറാഴ്ച വൈകീട്ട് കിഴിശ്ശേരി കുഴിയംപറമ്പ് ജിഎല്പി സ്കൂളിന് സമീപമാണ് കൊലപാതകം. അഞ്ചരയോടെ ഓട്ടോയില് വന്ന സംഘം പ്രജിത്തിന്റെ സുഹൃത്ത് നൗഫലുമായി സംസാരിക്കുകയായിരുന്നു. ഇവരുടെ സംസാരം വാക്കുതര്ക്കമായി.
അങ്ങാടിയില് നില്ക്കുകയായിരുന്ന പ്രജിത്ത്, സുഹൃത്തായ നൗഫലും സംഘവും ഉന്തും തള്ളും ഉണ്ടാവുന്നത് കണ്ട് അന്വേഷിക്കാനെത്തി. നൗഫലിനെ കത്തികൊണ്ട് കുത്തുന്നത് തടയുന്നതിനിടെ പ്രജിത്തിന് നെഞ്ചില് കുത്തേല്ക്കുകയായിരുന്നു. ഒന്നിലധികം തവണ പ്രജിത്തിന് കുത്തേറ്റിട്ടുണ്ട്. വാക്കു തര്ക്കത്തിനെ കൊലപാതകം നടത്തിയവര് പരിചയമുള്ളവര് തമ്മിലാണെന്നാണ് വിവരം.
നൗഫലിന് കൈക്ക് കുത്തേറ്റു. കുത്തേറ്റ പ്രജിത്ത് ഓടുന്നതിനിടെ റോഡരികില് വീണു. ഇതിനിടെ അക്രമി സംഘം രക്ഷപ്പെടുകയായിരുന്നു. നാട്ടുകാര് ചേര്ന്ന് പ്രജിത്തിനെ മഞ്ചേരി മെഡിക്കല് കോളേജ് ആശുപത്രിയിലേക്ക് കൊണ്ടുപോയെങ്കിലും വഴിയില് വെച്ച് തന്നെ ജീവന് നഷ്ടപ്പെട്ടു.
മൃതദേഹം കോഴിക്കോട് മെഡിക്കല് കോളേജ് മോര്ച്ചറിയിലേക്ക് മാറ്റി. അമ്മ പാര്വ്വതി, സഹോദരങ്ങള്, പ്രവീണ്, പ്രണവ്.
