മലപ്പുറം: പുത്തനത്താണി ഇക്ബാൽനഗറിൽ ഇന്നുണ്ടായ വാഹനാപകടത്തിൽ നവദമ്പതികൾ മരിച്ചു. പുത്തനത്താണി – തിരുനാവായ റോഡിൽ ചന്ദനക്കാവിൽ ആണ് അപകടം ഉണ്ടായത്. ചേരുലാൽ സ്വദേശികളായ മുഹമ്മദ്‌ സിദ്ദീഖ് (32 ), ഭാര്യ റീഷാ മൻസൂർ (25) എന്നിവരാണ് മരണപ്പെട്ടത്. ആറു മാസം മുമ്പ് ആയിരുന്നു ഇവരുടെ വിവാഹം.
ഇവർ സഞ്ചരിച്ചിരുന്ന ബൈക്കിൽ കാറിടിച്ചാണ് അപകടമുണ്ടായത്. കൊണ്ടോട്ടി പെരുവള്ളൂർ ഹോമിയോ ഡിസ്‌പെൻസറിയിലെ ഫാർമസിസ്റ്റ് ആണ് മരണപ്പെട്ട റീഷ. നിയന്ത്രണം വിട്ട കാർ ദമ്പതികൾ സഞ്ചരിച്ച ബൈക്കിൽ ഇടിക്കുകയായിരുന്നു.
മഴ പെയ്യുന്നതിനിടെയാണ് നിയന്ത്രണം തെറ്റിയ കാർ ഇവരുടെ ബൈക്കിൽ ഇടിച്ചത്. ഇടിയുടെ ആഘാതത്തിൽ ഇരുവരും തെറിച്ചു പോകുകയായിരുന്നു. മൃതദേഹങ്ങൾ പോസ്റ്റ്മോർട്ടത്തിനായി കോഴിക്കോട് മെഡി.കോളേജിലേക്ക് മാറ്റി. കൽപകഞ്ചേരി പൊലീസ് സംഭവത്തിൽ കേസെടുത്തിട്ടുണ്ട്.
