ഇന്ത്യയിൽ നിറഞ്ഞ സദസിൽ പ്രദർശിപ്പിച്ച ‘വിക്രം’ സിനിമ ദക്ഷിണ കൊറിയയിലും ഹൗസ്ഫുൾ. 27-ാമത് ബുസാൻ ഇൻ്റർനാഷണൽ ഫെസ്റ്റിവലിൽ ചിത്രം പ്രദർശിപ്പിച്ചപ്പോൾ കാണാനെത്തിയത് നൂറുകണക്കിനാളുകളാണ്. ഇപ്പോൾ ദക്ഷിണ കൊറിയയിലെ നിറഞ്ഞസദസ്സിന്റെ വീഡിയോ വൈറലാവുകയാണ്. ദക്ഷിണ കൊറിയൻ സിനിമാസ്വദകരും ഇതിനകം ചിത്രം എറ്റെടുത്തു കഴിഞ്ഞു.
കമൽ ഹാസൻ-ലോകേഷ് കനകരാജ് കൂട്ടുകെട്ടിൽ പിറന്ന വിക്രം സിനിമ ഇന്ത്യയിലും വൻ വിജയമായിരുന്നു. ദക്ഷിണ കൊറിയയിലെ ഹാൾമാർക്ക് ഔട്ട്ഡോർ തിയേറ്ററിലായിരുന്നു ചിത്രം പ്രദർശിപ്പിച്ചത്. ജൂൺ മൂന്നിന് റിലീസ് ചെയ്ത ചിത്രം റെക്കോർഡ് കളക്ഷൻ നേടിയിരുന്നു. ഇന്ത്യയിൽ നിന്ന് മാത്രം 307.60 കോടിയാണ് സിനിമ നേടിയത്. കേരളത്തിൽ നിന്നുള്ള സിനിമയുടെ കളക്ഷൻ 40.50 കോടി രൂപയാണ്.
House full for #Vikram at the Busan International Film Festival!@RKFI @ikamalhaasan @Dir_Lokesh Yet another feather in your cap ❤️????????#VikramatBIFF#BusanInternationalFilmFestival pic.twitter.com/Lpl6xuYt9y
— Priyannth RS (@Priyannth) October 7, 2022
ആന്ധ്രാപ്രദേശ്, തെലങ്കാന എന്നിവിടങ്ങളിലും 42.60 കോടി വിക്രം നേടി. കർണാടകയിൽ നിന്നും 25.40 കോടിയും മറ്റ് സംസ്ഥാനങ്ങളിൽ നിന്നുമായി 27.30 കോടിയാണ് വിക്രം കളക്ട് ചെയ്തത്. ഇന്ത്യ കൂടാതെ നോർത്ത് അമേരിക്ക, മിഡിൽ ഈസ്റ്റ്, മലേഷ്യ, സിംഗപ്പൂർ, ഓസ്ട്രേലിയ, യുകെ, ഫ്രാൻസ്, യൂറോപ്പ് എന്നിങ്ങനെ അന്താരാഷ്ട്ര ബോക്സ് ഓഫീസിൽ നിന്നായി 124.90 കോടി വിക്രം സ്വന്തമാക്കിയിരുന്നു.
