യുഎഇയില്‍ തൊഴിൽ നഷ്ടപ്പെട്ടാലും മൂന്ന് മാസം വരെ ശമ്പളം ലഭിക്കുന്ന അണ്‍എംപ്ലോയ്മെൻ്റ് ഇന്‍ഷുറന്‍സ് പദ്ധതി വരുന്നു. യുഎഇ മാനവ വിഭവശേഷി സ്വദേശിവത്കരണ മന്ത്രാലയത്തിൻ്റെ പദ്ധതിക്ക് 2023 ജനുവരി ഒന്ന് മുതല്‍ തുടക്കമാവുമെന്ന് അധികൃതര്‍ അറിയിച്ചു. ഫെഡറല്‍ ഗവണ്‍മെൻ്റ് ജീവനക്കാര്‍ക്കും സ്വകാര്യ മേഖലയിലെ തൊഴിലാളികള്‍ക്കും പദ്ധതിയില്‍ ചേരാവുന്നതാണ്.
രണ്ട് വിഭാഗങ്ങളിലായാണ് ഈ ഇന്‍ഷുറന്‍സ് പദ്ധി നടപ്പാക്കുക. അടിസ്ഥാന ശമ്പളം 16,000 ദിര്‍ഹമോ അതില്‍ കുറവോ ഉള്ളവരാണ് ആദ്യത്തെ വിഭാഗം. ഇവര്‍ക്ക് ഒരു മാസം അഞ്ച് ദിര്‍ഹം വീതം പ്രതിവര്‍ഷം 60 ദിര്‍ഹമാണ് ഇന്‍ഷുറന്‍സ് പ്രീമിയം തുക.
അടിസ്ഥാന ശമ്പളം 16,000 ദിര്‍ഹത്തില്‍ കൂടുതലുള്ളവരാണ് രണ്ടാമത്തെ വിഭാഗം. ഇവര്‍ മാസം 10 ദിര്‍ഹം വീതം വര്‍ഷം 120 ദിര്‍ഹം പ്രീമിയം അടയ്ക്കണം. വാര്‍ഷിക അടിസ്ഥാനത്തിലോ ആറ് മാസത്തിലൊരിക്കലോ മൂന്ന് മാസത്തിലൊരിക്കലോ അതുമല്ലെങ്കില്‍ ഓരോ മാസമായോ പ്രീമിയം അടയ്ക്കാൻ അവസരമുണ്ട്. മൂല്യവര്‍ദ്ധിത നികുതി ബാധകമാണ്. പ്രീമിയം തുക ഓരോ ജീവനക്കാരനും സ്വന്തമായാണ് അടയ്ക്കേണ്ടത്. അതുകൊണ്ടുതന്നെ അധിക ബാധ്യത സ്ഥാപനങ്ങൾക്കില്ല.
പദ്ധതിക്കായി യുഎഇയിലെ ഒന്‍പത് ഇന്‍ഷുറന്‍സ് കമ്പനികളുമായി മന്ത്രാലയം ധാരണയിലെത്തിയിട്ടുണ്ട്. തൊഴിലാളികള്‍ക്ക് അവരുടെ നിയന്ത്രണത്തിലല്ലാത്ത കാരണങ്ങള്‍ കൊണ്ട് ജോലി നഷ്ടമായാല്‍ ശമ്പളത്തിൻ്റെ 60 ശതമാനം വരെ ലഭിക്കും. ഒന്നാമത്തെ വിഭാഗത്തിലുള്ള ജീവനക്കാര്‍ക്ക് പരമാവധി 10,000 ദിര്‍ഹം വരെയും രണ്ടാമത്തെ വിഭാഗത്തിലുള്ള ജീവനക്കാര്‍ക്ക് പരമാവധി 20,000 ദിര്‍ഹം വരെയും ആയിരിക്കും ലഭിക്കുക.
ജോലി നഷ്ടമായാല്‍ ഇന്‍ഷുറന്‍സ് കമ്പനികളുടെ പ്രത്യേക വെബ്‍സൈറ്റ്, സ്‍മാര്‍ട്ട് ആപ്ലിക്കേഷന്‍, കോള്‍ സെൻ്റര്‍ എന്നിവയിലൂടെ ക്ലെയിം അപേക്ഷ നല്‍കാം. ജോലി നഷ്ടമായ ദിവസം മുതല്‍ 30 ദിവസത്തിനുള്ളിൽ അപേക്ഷ നല്‍കിയിരിക്കണം. അപേക്ഷ ലഭിച്ച് രണ്ടാഴ്ചയ്ക്കുള്ളിൽ പണം ലഭിക്കും. പരമാവധി മൂന്ന് മാസം വരെ ഇങ്ങനെ പണം ലഭിക്കും.
ഇന്‍ഷുറന്‍സ് പദ്ധതിയില്‍ അംഗമായശേഷം തുടര്‍ച്ചയായി 12 മാസമെങ്കിലും ജോലി ചെയ്തവർക്കേ ക്ലെയിം ലഭിക്കൂകയുള്ളൂ. മറ്റൊരു ജോലിയില്‍ പ്രവേശിക്കുകയോ രാജ്യം വിട്ടുപോയാലോ തുക ലഭിക്കില്ല. അച്ചടക്ക നടപടികളുടെ ഭാഗമായി പുറത്താക്കപ്പെട്ടവര്‍ക്ക് ഇന്‍ഷുറന്‍സ് തുക ലഭിക്കില്ല.
നിക്ഷേപകര്‍, സ്വന്തം കമ്പനിയില്‍ ജോലി ചെയ്യുന്നവര്‍, ഗാര്‍ഹിക തൊഴിലാളികള്‍, താത്കാലിക കരാര്‍ അടിസ്ഥാനത്തില്‍ ജോലി ചെയ്യുന്നവര്‍, 18 വയസിന് താഴെയുള്ളവര്‍, ഒരു ജോലിയില്‍ നിന്ന് ആനുകൂല്യങ്ങള്‍ പറ്റി വിരമിച്ച ശേഷം മറ്റൊരു ജോലിയില്‍ പ്രവേശിച്ചവര്‍ എന്നിവർക്ക് പദ്ധതിയില്‍ ചേരാന്‍ യോഗ്യതയില്ല. എന്നാല്‍ കമ്മീഷന്‍ അടിസ്ഥാനത്തില്‍ ജോലി ചെയ്യുന്നവര്‍ക്ക് പദ്ധിതിയുടെ ഭാഗമാകാം.
