യുഎഇ താമസ വീസയുള്ളവർക്ക് ഇനി 15 ദിവസത്തിനുള്ളിൽ യുകെ വീസ ലഭിക്കും. ഏഴ് ആഴ്ചവരെ നീണ്ടുനിന്നിരുന്ന വീസ നടപടികളാണ് രണ്ടാഴ്ചയാക്കി കുറച്ചത്. കഴിഞ്ഞ വേനലവധിക്ക് വീസ ലഭിക്കാനുള്ള കാലതാമസം നേരിട്ടതിനെ തുടർന്ന് യുകെ യാത്ര ബുക്ക് ചെയ്ത പലരും അവസാന നിമിഷം യാത്ര നടത്താൻ കഴിഞ്ഞിരുന്നില്ല. കൂടാതെ ഹീത്രോ വിമാനത്താവളത്തിൽ ദിവസം ഒരു ലക്ഷത്തിൽ കൂടുതൽ യാത്രക്കാരെ അനുവദിക്കില്ലെന്ന നിബന്ധനയും യാത്രക്കാർക്ക് തിരിച്ചടിയായിരുന്നു.
അതേസമയം ഇപ്പോൾ നിയന്ത്രണങ്ങൾ എടുത്തു കളഞ്ഞിട്ടുണ്ട്. ബ്രിട്ടിഷ് എയർവേയ്സും എമിറേറ്റ്സ് കമ്പനികളും അവരുടെ മുഴുവൻ വിമാനങ്ങളും സർവീസിനിറക്കുമെന്ന് അറിയിച്ചു. ഇത് യുകെ യാത്ര കൂടുതൽ എളുപ്പമാക്കുമെന്നാണ് നിഗമനം. കൂടാതെ സീറ്റുകൾ വർധിച്ചതിനാൽ വിമാന നിരക്കിലും കുറവുണ്ടെന്ന് ട്രാവൽ ഏജൻസികൾ വ്യക്തമാക്കി.
48 മണിക്കൂറിനകം തന്നെ ബിസിനസ് വീസകൾ ലഭ്യമാക്കുമെന്നും യുകെ ഇമിഗ്രേഷൻ അറിയിച്ചിട്ടുണ്ട്. അതേസമയം വീസ നടപടികൾ വേഗത്തിൽ പൂർത്തിയാകുമെന്നതിനാൽ കൂടുതൽ പ്രവാസികൾ യുകെയിലേക്ക് എത്തുമെന്നാണ് ട്രാവൽ ഏജൻസികളുടെ പ്രതീക്ഷ. യുകെയിൽ മക്കളെ വിട്ടു പഠിപ്പിക്കുന്ന പ്രവാസികൾക്ക് അവധിക്കാലം കുട്ടികൾക്കൊപ്പം ചെലവഴിക്കാനുള്ള അവസരവും ഇതിലൂടെ ഒരുങ്ങുകയാണ്.
