ട്രാഫിക് നിയമലംഘന പിഴ അടയ്ക്കുന്നതിനും മുൽക്കിയയുടെ പ്രിന്റിംഗ് സേവനത്തിനും സൗകര്യമൊരുക്കി റോയൽ ഒമാൻ പോലീസ്. ഒമാൻ ഇൻവെസ്റ്റ്മെന്റ് ആൻഡ് ഫിനാൻസ് കമ്പനിയുടെ (ഒ ഐ എഫ് സി) ‘ഖിദ്മ’യിലൂടെയാണ് സൗകര്യം ഒരുക്കിയിരിക്കുന്നത്. ഇതിന്റെ ഭാഗമായി ഒ ഐ എഫ് സി യുമായി ആർ ഒ പി കരാർ ഒപ്പിട്ടു.
ആർ ഒ പി പോലീസ് ആൻഡ് കസ്റ്റംസിലെ അസിസ്റ്റന്റ് ഇൻസ്‌പെക്ടർ ജനറൽ ഓഫ് അഡ്മിനിസ്ട്രേറ്റീവ് ആൻഡ് ഫിനാൻഷ്യൽ അഫയേഴ്സ് മേജർ ജനറൽ ഖലീഫ ബിൻ അലി അൽ സിയാബിയും ഒ എഫ് ഐ സി സി ഇ ഒ സെയ്ത് ബിൻ അഹമ്മദ് സഫ്രാറുമാണ് കരാറിൽ ഒപ്പുവച്ചത്. ഖിദ്മയുടെ ഓരോ ചാനലുകളിലൂടെയും ലഭിക്കുന്ന സേവനങ്ങളെപ്പറ്റി വരും ദിവസങ്ങളിലായിരിക്കും അറിയിപ്പുണ്ടാവുക.
അതേസമയം തുടക്കത്തിൽ എല്ലാ ശാഖകളിലും ട്രാഫിക് പിഴയടയ്ക്കാനുള്ള സൗകര്യം ലഭ്യമാണ്. ഷോപ്പിംഗ് മാളുകളിലും തിരഞ്ഞെടുത്ത ഖിദ്മ ശാഖകളിലും കിയോസ്കുകൾ സ്ഥാപിച്ചിട്ടുണ്ട്. ഈ മെഷീനുകളിലൂടെ മുൽക്കിയ പ്രിന്റ് എടുക്കാനുള്ള സൗകര്യവും ഒരുക്കുമെന്ന് ഔദ്യോഗിക വൃത്തങ്ങൾ വ്യക്തമാക്കി.
