ചെന്നൈ: ക്രിസ്മസ് അവധിക്ക് നാട്ടിലെത്താൻ വഴി തേടുന്ന ചെന്നൈ മലയാളികൾക്ക് ആശ്വാസമായി സ്പെഷ്യൽ വന്ദേഭാരത് സർവ്വീസ്. ചെന്നൈയിൽ നിന്നും കേരളത്തിലേക്കുള്ള എല്ലാ തീവണ്ടികളും ആഴ്ചകൾക്ക് മുൻപേ തന്നെ വെയിറ്റിംഗ് ലിസ്റ്റായിരുന്നു. സ്വകാര്യബസുകളിൽ 5000 രൂപ വരെയാണ് ക്രിസ്മസ് അവധി ദിനങ്ങളിലെ ടിക്കറ്റ് റേറ്റ്. കെഎസ്ആർടിസിയുടെ സെപ്ഷ്യൽ സർവ്വീസുകളടക്കം ഇതിനോടക്കം ഫുൾ ബുക്കിംഗാണ്. ഈ സാഹചര്യത്തിലാണ് ആശ്വാസമായി സെപ്ഷ്യൽ വന്ദേഭാരത് സർവ്വീസ് ദക്ഷിണ റെയിൽവേ ആരംഭിച്ചത്.
ക്രിസ്മസ് ദിനത്തിൽ പുലർച്ചെ 4.30-ന് ചെന്നൈയിൽ നിന്നും പുറപ്പെടുന്ന ട്രെയിൻ ഉച്ചയ്ക്ക് 3.30-ന് കോഴിക്കോട് എത്തിച്ചേരും. നിലവിൽ ശബരിമല തീർത്ഥാടകർക്കായി ചെന്നൈയിൽ നിന്നും കോട്ടയത്തേക്കും തിരിച്ചും സ്പെഷ്യൽ വന്ദേഭാരത് സർവ്വീസ് നടത്തുന്നുണ്ട്. ഈ ട്രെയിനിൻ്റെ റേക്കാണ് ശബരിമല സ്പെഷ്യൽ ആയി ചെന്നൈ – കോഴിക്കോട് റൂട്ടിൽ സർവ്വീസ് നടത്തുക. എട്ട് കോച്ചുകളുള്ള റേക്കാവും സർവ്വീസ് നടത്തുക. കോഴിക്കോട് സർവ്വീസ് അവസാനിപ്പിച്ച ശേഷം ട്രെയിൻ കൊങ്കണ് റെയിൽവേയിൽ ട്രെയൽ റണിന് കൈമാറണമെന്നും ദക്ഷിണറെയിൽവേ ആസ്ഥാനത്ത് നിന്നും പാലക്കാട് ഡിവിഷൻ കൈമാറിയ ഉത്തരവിൽ പറയുന്നു.
