ദുബായി: കുവൈറ്റിലെ ചാനൽ റിപ്പോർട്ടറോട് ബുർജ് ഖലീഫ കാണണമെന്ന ആഗ്രഹം പ്രകടിപ്പിച്ച ബാലനെ കുടുംബസമേതം ദുബായിലേക്ക് ക്ഷണിച്ച് ദുബായ് കിരീടാവകാശി ഷെയ്ഖ് ഹംദാൻ. കുവൈറ്റി പൌരനായ ബദർ എന്ന കുട്ടിയുടെ വീഡിയോയാണ് സമൂഹമാധ്യമങ്ങളിൽ വൈറലായത്.
വീഡിയോ ശ്രദ്ധയിൽപെട്ടയുടൻ തന്നെ ദുബായ് രാജകുമാരൻ കുട്ടിയ ദുബായിലേക്ക് ക്ഷണിക്കുകയായിരുന്നു. ലോകത്തിന്‍റെ നെറുകയിലേക്ക് തലയുയർത്തി നിൽക്കുന്ന ബുർജ് ഖലീഫയെയും ദുബായിലെ പ്രധാന വിനോദ സഞ്ചാര കേന്ദ്രങ്ങളും കണ്ട് ആസ്വദിക്കാൻ ബദറിനെയും കുടുംബത്തെയും ക്ഷണിക്കുന്നുവെന്ന് ഷെയ്ഖ് ഹംദാൻ പറഞ്ഞു.
സന്ദർശിക്കാൻ ഏറ്റവും ആഗ്രഹമുള്ള സ്ഥലമേതാണെന്ന മാധ്യമപ്രവർത്തകന്‍റെ ചോദ്യത്തിന് മറുപടിയായാണ് കുട്ടി ബുർജ് ഖലീഫ കാണണമെന്ന് പറഞ്ഞത്. കുട്ടിയുടെ ആഗ്രഹത്തിന് വലിയ വില കൽപ്പിച്ച ഷെയ്ഖ് ഹംദാനെ പ്രശംസിച്ചു കൊണ്ട് നിരവധി പേർ രംഗത്ത് വന്നു
