ആംബുലൻസുകൾക്ക് വഴി മാറികൊടുത്തില്ലെങ്കിൽ വാഹനങ്ങൾക്കെതിരെ നിയമനടപടി കർശനമാക്കി സൗദി. ഇത്തരത്തിലുള്ള വാഹനങ്ങളെ നിരീക്ഷിക്കുന്നതിനായുള്ള ഓട്ടോമാറ്റിക് സംവിധാനം ആരംഭിച്ചതായി സൗദി റെഡ്ക്രസൻറ് അതോറിറ്റി അറിയിച്ചു. ട്രാഫിക് വകുപ്പിന്റെ സഹകരണത്തോടെയാണ് സംവിധാനം നടപ്പാക്കുന്നത്.
ആംബുലൻസുകളുടെ വഴി തടസ്സപ്പെടുത്തുന്നവരെയും അതിനെ പിന്തുടരുന്നവരെയും ഈ ഓട്ടോമാറ്റിക് സംവിധാനം സ്വയം നിരീക്ഷിക്കുകയും നിയമലംഘനം രേഖപ്പെടുത്തുകയും ചെയ്യും. ട്രാഫിക് സുരക്ഷ വർധിപ്പിക്കുക, ജീവൻ സംരക്ഷിക്കുക, ഡ്രൈവർമാർ നിർദ്ദിഷ്ട റോഡിലെ നിർദ്ദിഷ്ട ട്രാക്കുകൾ തന്നെ പാലിക്കുന്നു എന്ന് ഉറപ്പാക്കുക, അതിന്റെ ശതമാനം വർധിപ്പിക്കുക എന്നിവയാണ് പുതിയ സംവിധാനം നടപ്പാക്കുന്നതിന്റെ ലക്ഷ്യം. കൂടാതെ ആംബുലൻസ് സേവനങ്ങളുടെ ഗുണനിലവാരവും കാര്യക്ഷമതയും വർധിപ്പിക്കുന്നതിന് സഹായിക്കുമെന്നും റെഡ്ക്രസൻറ് വ്യക്തമാക്കി.
രണ്ട് ട്രാക്ക് മാത്രമുള്ള റോഡാണെങ്കിൽ വാഹനങ്ങൾ ഇടതുവലത് ഭാഗത്തേക്ക് മാറി കൊടുക്കണം. മധ്യ ട്രാക്ക് ആംബുലൻസിന് പോകാനായി ഒഴിവാക്കി നൽകണം. അതേസമയം റോഡ് മൂന്നോ അതിലധികമോ ട്രാക്കുകളുള്ളതാണെങ്കിൽ വലത്, മധ്യ ട്രാക്കുകളിലെ വഹനങ്ങൾ വലതു വശേത്തക്കും ഇടത് പാതയിലോടുന്ന വാഹനങ്ങൾ ഇടത് ഭാഗത്തേക്കും വഴി മാറണം.
