പശുവിനെ ദേശീയ മൃഗമായി പ്രഖ്യാപിക്കാൻ കേന്ദ്ര സർക്കാരിന് നിർദേശം നൽകണമെന്ന് സുപ്രീം കോടതിയിൽ ഹർജി . ഹർജി പരിഗണിക്കാതിരുന്ന സുപ്രീം കോടതി ഇതാണോ കോടതിയുടെ ജോലിയെന്ന് ചോദിക്കുകയും ഹർജിക്കാരനെ രൂക്ഷമായി വിമർശിക്കുകയും ചെയ്തു.
ഇതാണോ കോടതിയുടെ ജോലിയെന്നും പിഴ ഈടാക്കാൻ നിർബന്ധിതരാക്കുന്ന ഇത്തരം ഹർജികൾ എന്തിനാണ് നിങ്ങൾ സമർപ്പിക്കുന്നതെന്നും എന്ത് മൗലികാവകാശമാണ് ഇവിടെ ലംഘിക്കപ്പെടുന്നതെന്നും കോടതി ചോദിച്ചു. ജസ്റ്റിസ് എസ് കെ കൗൾ, അഭയ് എസ് എന്നിവർ അധ്യക്ഷരായ ബെഞ്ചാണ് രൂക്ഷമായി ഹർജിയെ എതിർത്തത്.
ഗോവൻഷ് സേവ സദൻ എന്ന എൻജിഒയാണ് പശുവിനെ ദേശീയ മൃഗമായി പ്രഖ്യാപിക്കണമെന്ന പൊതു താത്പര്യ ഹർജിയുമായി സുപ്രീം കോടതിയിലെത്തിയത്. പിഴ ചുമത്തുമെന്ന് സുപ്രീം കോടതി മുന്നറിയിപ്പ് നൽകിയതോടെ ഹർജി അഭിഭാഷകൻ പിൻവലിച്ചു.
