ആലുവയില്‍ അഞ്ചുവയസുകാരിയെ കൊലപ്പെടുത്തിയ സംഭവത്തില്‍ പ്രതിയെ വീട്ടിലെത്തിച്ച് തെളിവെടുപ്പ് നടത്തി പൊലീസ്. പ്രതിയുമായി വീട്ടിലെത്തിയപ്പോള്‍ കുട്ടിയുടെ മാതാവും പിതാവും പ്രതിക്ക് നേരെ പ്രതിഷേധിച്ച് പാഞ്ഞടുത്തു. മാതാവ് കസേരയെടുത്ത് പ്രതിയ്ക്ക് നേരെ എറിയാന്‍ ശ്രമിക്കുകയും ചെയ്തു.
കൊല്ലപ്പെട്ട കുട്ടിയുടെ വീടിന്റെ മുകളിലെ നിലയിലായിരുന്നു അസ്ഫാക്ക് ആലം താമസിച്ചിരുന്നത്. പ്രതിയെ വീട്ടില്‍ നിന്ന് ഇറക്കിയപ്പോഴും കുട്ടിയുടെ പിതാവ് ഇയാള്‍ക്കെതിരെ പാഞ്ഞടുത്തിരുന്നു. എന്നാല്‍ പൊലീസ് ഇടപെട്ടാണ് ഇവരെ തടഞ്ഞത്.
കുട്ടിയെ കൊലപ്പെടുത്തിയ സ്ഥലത്തും പൊലീസ് പ്രതിയുമായി തെളിവെടുപ്പ് നടത്തിയിരുന്നു. ജ്യൂസ് വാങ്ങിയ കടയിലും ബീവറേജ് കടകളിലുമടക്കം പ്രതിയുമായി തെളിവെടുപ്പ് നടത്തി. കൊല്ലപ്പെട്ട കുട്ടിയുമായി മാര്‍ക്കറ്റിലെത്തുന്നതിന് മുമ്പ് പോയ കടകളിലുമെത്തിച്ച് തെളിവെടുപ്പ് നടത്തി.
ആലുവ മാര്‍ക്കറ്റ് പരിസരത്ത് നിരവധി പേരാണ് തടിച്ചുകൂടിയിരുന്നത്. പലരും പ്രതിക്കെതിരെ നേരെ പാഞ്ഞടുക്കുകയും ആക്രമിക്കാനും ശ്രമിച്ചു.
നേരത്തെ കുട്ടിയുടെ മൃതദേഹം കണ്ടെടുത്ത സ്ഥലത്ത് നിന്ന് കുട്ടിയുടെ ചെരിപ്പും വസ്ത്രത്തിന്റെ ഭാഗങ്ങളും കണ്ടെത്തിയിരുന്നു. പോസ്റ്റുമോര്‍ട്ടം നടത്തിയ സര്‍ജനും സ്ഥലത്തെത്തി പരിശോധന നടത്തുകയും ചെയ്തിരുന്നു. ഇതിന് പിന്നാലെയാണ് പ്രതിയുമായി എട്ടോളം സ്ഥലത്ത് തെളിവെടുപ്പ് നനടത്തിയത്.
