യുഎഇ സെൻട്രൽ ബാങ്ക് പുറത്തിറക്കിയ 1000 ദിർഹത്തിന്‍റെ പുതിയ ബാങ്ക് നോട്ട് ഇന്ന് മുതൽ ധനവിനിമയ സ്ഥാപനങ്ങളിൽ ലഭ്യമാകും. യുഎഇയുടെ 51-ാം ദേശീയ ദിനാഘോഷ വേളയിൽ പുറത്തിറക്കിയ പുതിയ നോട്ടാണ് പ്രാബല്യത്തിൽ വരുന്നത്.
പുതിയ നോട്ടിൽ രാജ്യത്തിന്‍റെ ചരിത്രത്തിനൊപ്പം ആണവോർജ നിലയവും ബഹിരാകാശ ഗവേഷണവും ഉൾപ്പെടെയുള്ള സമീപകാലത്തെ നേട്ടങ്ങളും ഇടം നേടിയിട്ടുണ്ട്.
യുഎഇ രാഷ്‍ട്രപിതാവായ ഷെയ്ഖ് സായിദിനൊപ്പം അബുദാബിയിലെ ബറാക ആണവോർജ നിലയവും ചൊവ്വാ ഗ്രഹത്തിലെ പര്യവേക്ഷണത്തിനായി യുഎഇ വിക്ഷേപിച്ച ഹോപ്പ് പ്രോബും നോട്ടിൽ ആലേഖനം ചെയ്യപ്പെട്ടിരിക്കുന്നു. സമീപകാല ചരിത്രത്തിൽ യുഎഇ കൈവരിച്ച രണ്ട് സുപ്രധാന നേട്ടങ്ങളാണ് ഇവ. കാഴ്ച പരിമിതർക്ക് ബാങ്ക് നോട്ടിന്‍റെ മൂല്യം തിരിച്ചറിയാൻ സഹായിക്കും വിധം ബ്രെയിൽ ലിപിയും നോട്ടിൽ ഉൾപ്പെടുത്തിയിട്ടുണ്ട്
