പ്രവാസികൾക്ക് ഇനി യുപിഐ വഴി പണമിടപാട് നടത്താം. മറ്റ് രാജ്യങ്ങളിലെ മൊബൈൽ നമ്പർ ഉപയോഗിച്ചു തന്നെ യുപിഐ വഴി പണമിടപാട് നടത്താനുള്ള സാധ്യതയാണ് ഇപ്പോഴൊരുങ്ങുന്നത്. ഈ സംവിധാനം നിലവിൽ വരുന്നതോടെ യുകെ, യുഎഇ, സൗദി, ഖത്തർ, ഹോങ്ങ്കോങ്ങ്, കാനഡ, ഓസ്ട്രേലിയ, യുഎസ്എ, സിംഗപ്പൂർ എന്നിങ്ങനെ പത്തോളം രാജ്യങ്ങളിൽ താമസിക്കുന്ന ഇന്ത്യക്കാർക്ക് വിദേശ നമ്പറുമായി ലിങ്ക് ചെയ്ത എൻആർഇ-എൻആർഒ അക്കൗണ്ടുകളിൽ നിന്ന് ഇനി സുഗമമായി യുപിഐ ഉപയോഗിച്ച് പണമിടപാട് നടത്താം.
അതേസമയം യുപിഐ ഇടപാടുകൾ അന്താരാഷ്ട്ര തലത്തിലേക്ക് വ്യാപിപ്പിക്കുന്നതിന്റെ ഭാഗമായാണ് കേന്ദ്ര സർക്കാരിന്റെ ഈ സുപ്രധാന നീക്കം. കൂടാതെ വിവിധ ബാങ്കുകളോട് ഏപ്രിൽ 30ന് അകം തന്നെ ഇത് സംബന്ധിച്ച മാറ്റങ്ങൾ വരുത്താൻ നാഷണൽ പേയ്മെന്റ് കോർപറേഷൻ നിർദേശം നൽകിയിട്ടുണ്ട്.
ഫോറിൻ എക്സ്ചേഞ്ച് ആക്ട്, ആർബിഐ ചട്ടം എന്നിവയ്ക്കനുസൃതമായി ഇടപാടുകൾ ഇടപാടുകൾ നടക്കുന്നുണ്ടോ എന്ന് ബാങ്കുകൾ പരിശോധിക്കുകയും ഉറപ്പ് വരുത്തുകയും ചെയ്യണം. അതേസമയം ഒരുദിവസം എത്ര രൂപ വരെ അയക്കാമെന്ന കാര്യത്തിൽ ഇതുവരെ സർക്കാർ വ്യക്തത വരുത്തിയിട്ടില്ല.
