തിരുവനന്തപുരത്തെ രണ്ട് റെയില്വേ സ്റ്റേഷനുകളുടെ പേരുമാറ്റാന് സംസ്ഥാന സര്ക്കാര് അംഗീകാരം. നേമം റെയില്വേ സ്റ്റേഷന്റെയും കൊച്ചുവേളി റെയില്വേ സ്റ്റേഷന്റെയും പേര് മാറ്റാനാണ് സംസ്ഥാന സര്ക്കാര് സമ്മതം നല്കിയത്. അതേസമയം അന്തിമ തീരുമാനമെടുക്കേണ്ടത് കേന്ദ്ര ആഭ്യന്തര മന്ത്രാലയമാണ് എന്നതിനാല് തന്നെ ട്രാന്സ്പോര്ട്ട് സെക്രട്ടറി ആഭ്യന്തര മന്ത്രാലയത്തിന് കത്ത് നല്കി.
നേമം റെയില്വേ സ്റ്റേഷന്റെ പേര് തിരുവനന്തപുരം സൗത്ത്, കൊച്ചുവേളി സ്റ്റേഷന്റെ പേര് തിരുവനന്തപുരം നോര്ത്ത് എന്നിങ്ങനെ ആക്കാനാണ് നീക്കം. പേര് മാറ്റുന്നതില് നേരത്തെ തന്നെ തീരുമാനം എടുത്തിരുന്നു. തിരുവനന്തപുരം സെന്ട്രല് സ്റ്റേഷന്റെ ഉപഗ്രഹ സ്റ്റേഷനുകളായി നേമത്തെയും കൊച്ചുവേളിയെയും മാറ്റുന്നതിന്റെ ഭാഗമായാണ് പേരുമാറ്റം.
പേര് മാറ്റുന്നതില് റെയില്വേ ബോര്ഡും അനുകൂല നിലപാടാണ് സ്വീകരിച്ചത്. തുടര്ന്ന് പേരുമാറ്റത്തിന് സംസ്ഥാന സര്ക്കാര് ഔദ്യോഗികമായി അനുമതി നല്കുകയായിരുന്നു.
