കോടികളുടെ സാമ്പത്തിക തട്ടിപ്പ് നടത്തിയ കേസില്‍ മലയാളിയായ യുവാവും യുവതിയും പിടിയില്‍. തൃശൂര്‍ അത്താണി സ്വദേശി സുബീഷ് പി വാസു, ബിലേക്കഹള്ളഅി സ്വദേശിനി ശില്‍പ ബാബു എന്നിവരാണ് പിടിയിലായത്.
മദ്യവ്യാപാരത്തില്‍ പങ്കാളിത്തം വാഗ്ദാനം ചെയ്താണ് തട്ടിപ്പ് നടത്തിയത്. ഹൈദരാബാദില്‍ നിന്നുള്ള വ്യാപാരിയില്‍ നിന്ന് 65 ലക്ഷം രൂപയാണ് ഇരുവരും തട്ടിയത്. കേന്ദ്ര സംസ്ഥാന സര്‍ക്കാരുകൡല്‍ പിടിപാടുണ്ടെന്ന് വിശ്വസിപ്പിച്ചാണ് വ്യാപാരിയില്‍ നിന്നും ഇവര്‍ പണം തട്ടിയത്.
വ്യാപാരിയായ കെ ആര്‍ കമലേഷ് കഴിഞ്ഞ വര്‍ഷമാണ് ഇവര്‍ക്ക് പണം കൈമാറിയത്. ഒരു വര്‍ഷം കാത്തിരുന്നിട്ടും വ്യാപാരം തുടങ്ങുകയോ പണം തിരിച്ചുകൊടുക്കുകയോ ചെയ്യാതിരുന്നതിനെ തുടര്‍ന്നാണ് പൊലീസിനെ സമീപിച്ചത്.
ബിസിനസ് എക്‌സ്‌ചേഞ്ച് എന്ന കമ്പനിയുടെ ഉടമയാണ് സുബീഷ്. കൊല്ലം കരുനാഗപ്പള്ളിയില്‍ നിന്നാണ് ഇരുവരെയും കസ്റ്റഡിയില്‍ എടുത്തത്. ഇവരെ ബംഗളൂരു പൊലീസിന് കൈമാറുകയായിരുന്നു. ഇരുവരും മാറത്തഹള്ളിയില്‍ ഒരുമിച്ചായിരുന്നു താമസം.
എന്‍ഡിഎ സഖ്യകക്ഷിയായ രാഷ്ട്രീയ ലോക് ജനശക്തി പാര്‍ട്ടിയുടെ ആര്‍ എല്‍ ജെ പി കര്‍ണാടക അധ്യക്ഷ കൂടിയാണ് ശില്‍പ. കോടിക്കണക്കിന് രൂപയുടെ സാമ്പത്തിക തട്ടിപ്പുമായി ബന്ധപ്പെട്ട് പ്രതികള്‍ക്കെതിരെ ബെംഗളൂരുവിലെ മറ്റു പൊലീസ് സ്റ്റേഷനുകളിലും കേസുകളുണ്ട്. ഇരുവരെയും ജുഡീഷ്യല്‍ കസ്റ്റഡിയില്‍ റിമാന്‍ഡ് ചെയ്തു.
