മമ്മൂട്ടിയെ കേന്ദ്ര കഥാപാത്രമാക്കി ജിയോ ബേബി സംവിധാനം ചെയ്ത കാതലിനെ പ്രശംസിച്ച് നടന്‍ മോഹന്‍ലാല്‍. മലൈക്കോട്ടൈ വാലിബന്റെ പ്രമോഷനുമായി ബന്ധപ്പെട്ട് ദി ക്യുവിന് നല്‍കിയ അഭിമുഖത്തിലായിരുന്നു മോഹന്‍ലാല്‍ സിനിമയെ കുറിച്ച് സംസാരിച്ചത്.
ഇപ്പോള്‍ ഞാന്‍ മമ്മൂട്ടിക്കയുടെ ഒരു സിനിമ കണ്ടു. വളരെ എനിക്ക് ഇഷ്ടപ്പെട്ട ഒരു സിനിമയാണ് കാതല്‍. മമ്മൂട്ടിക്ക ഏറ്റവും മനോഹരമായി അഭിനയിച്ചിരിക്കുന്ന സിനിമയാണ്. അപ്പോള്‍ അങ്ങനെയൊരു സിനിമ നിങ്ങള്‍ ചെയ്യുമോ എന്ന് ചോദിച്ച് കഴിഞ്ഞാല്‍ എനിക്ക് ഇപ്പോള്‍ പറയാന്‍ പറ്റില്ല. അത്തരം ഒരു സിനിമ നമ്മളുടെ അടുത്ത് വരുകയാണ്. ഒരു അഭിനേതാവിനെ സംബന്ധിച്ചെടുത്തോളം അത്തരം സിനിമ എന്നത് ഒരു വലിയ ചലഞ്ചാണ്. അങ്ങനെ ചെയ്യാന്‍ പാടില്ല എന്നൊന്നുമില്ല. വീണ്ടും ഞാന്‍ പറയുന്നു അത്തരത്തിലുള്ള സിനിമകളും കഥാപാത്രങ്ങളും കിട്ടുന്നത് ഒരു അഭിനേതാവിനെ സംബന്ധിച്ചെടുത്തോളം ചലഞ്ചാണ് ഭാഗ്യവുമാണ്. – മോഹന്‍ലാല്‍
അതേസമയം മോഹന്‍ലാല്‍ നായകനായ മലൈക്കോട്ടൈ വാലിബന്‍ ജനുവരി 25നാണ് തിയേറ്ററില്‍ എത്തുന്നത്. ലിജോ ജോസ് പെല്ലിശ്ശേരി സംവിധാനം ചെയ്ത ചിത്രം കാലഘട്ടങ്ങളോ ദേശ വ്യത്യാസങ്ങളോ ഇല്ലാത്ത ഒരു സിനിമയാണ്. പ്രണയവും,വിരഹവും, ദുഃഖവും, അസൂയയും, സന്തോഷവും, പ്രതികാരവുമുള്ള ചിത്രമാണ് മലൈക്കോട്ടൈ വാലിബന്‍.
സൊണാലി കുല്‍ക്കര്‍ണി, ഹരീഷ് പേരടി, ഡാനിഷ് സെയ്ത്, മനോജ് മോസസ്, കഥ നന്ദി, മണികണ്ഠന്‍ ആചാരി തുടങ്ങി നിരവധി താരങ്ങളാണ് ചിത്രത്തില്‍ പ്രധാന വേഷങ്ങളിലെത്തുന്നത്. ഷിബു ബേബി ജോണ്‍, അച്ചു ബേബി ജോണ്‍ എന്നിവരുടെ നേതൃത്വത്തിലുള്ള ജോണ്‍ ആന്‍ഡ് മേരി ക്രിയേറ്റിവിസ്, കൊച്ചുമോന്റെ ഉടമസ്ഥതയിലുള്ള സെഞ്ച്വറി ഫിലിംസ്, അനൂപിന്റെ മാക്സ് ലാബ്, വിക്രം മെഹ്‌റ, സിദ്ധാര്‍ഥ് ആനന്ദ് കുമാര്‍ എന്നിവരുടെ ഉടമസ്ഥയിലുള്ള സരിഗമ ഇന്ത്യാ ലിമിറ്റഡ് എന്നിവരാണ് ചിത്രത്തിന്റെ നിര്‍മ്മാതാക്കള്‍.
ചിത്രത്തിന്റെ തിരക്കഥ ഒരുക്കിയിരിക്കുന്നത് പി എസ് റഫീക്കാണ്. ‘ചുരുളി’ക്ക് ശേഷം മധു നീലകണ്ഠന്‍ വീണ്ടും ലിജോയ്ക്ക് വേണ്ടി ക്യാമറ ചലിപ്പിക്കുന്ന ചിത്രത്തിന്റെ സംഗീതം നിര്‍വഹിക്കുന്നത് പ്രശാന്ത് പിള്ളയാണ്. ദീപു ജോസഫ് എഡിറ്റിംഗ് നിര്‍വഹിക്കുന്ന ചിത്രത്തിന്റെ മേക്കപ്പ് റോണക്സ് സേവ്യറാണ്. പി ആര്‍ ഓ പ്രതീഷ് ശേഖര്‍.
