പ്രശസ്ത ഒ ടി ടി പ്ലാറ്റ്ഫോമായ നെറ്റ്ഫ്ലിക്സിൽ 2021 ൽ റിലീസ് ചെയ്ത മലയാള സിനിമയാണ് മിന്നൽ മുരളി. മലയാളത്തിലെ ആദ്യത്തെ സൂപ്പർ ഹീറോ എന്ന പരിവേഷത്തോടുകൂടി ലോകം മൊത്തം ഏറ്റെടുത്ത സിനിമ കൂടിയാണിത്. നിരവധി അവാർഡുകളും സിനിമ നേടിയിട്ടുണ്ട്. ഇപ്പോഴിതാ സിനിമയിലെ ഡിലീറ്റഡ് സീൻ നെറ്റ്ഫ്ലിക്സ് റിലീസ് ചെയ്തിരിക്കുകയാണ്. എന്നാൽ സംഗതി നെറ്റ്ഫ്ലിക്സിന്റെ ഒരു നമ്പറാണ്. നെറ്റ്ഫ്ലിക്സ് പ്ലെ ബാക്ക് 2022 എന്ന തീമുമായി ബന്ധപ്പെട്ട രസകരമായൊരു വിഡിയോ ആണ് നെറ്റ്ഫ്ലിക്സ് റിലീസ് ചെയ്തത്.
2022ലും കഴിഞ്ഞ ഡിസംബറിലുമായി റിലീസ് ചെയ്തിട്ടുള്ള പ്രശസ്ത സിനിമകളുടെയും സീരിസുകളുടെയും കഥാപാത്രങ്ങൾ തമ്മിലുള്ള ക്രോസ് ഓവറാണ് ഈ വിഡിയോയിലുള്ളത്. ഇതില്‍ മിന്നൽ മുരളിയായി ടൊവിനോ എത്തുന്നത് ഭൂൽ ഭുലയ്യ രണ്ടാം ഭാഗത്തിലെ നായകനായ കാർത്തിക് ആര്യന്റെ കഥാപാത്രത്തിന് മുന്നിലാണ്. മലയാളത്തിൽ ഡയലോഗ് പറഞ്ഞാണ് കാർത്തിക് ആര്യനെ ടൊവിനോ ഭയപ്പെടുത്തുന്നത്. മൂന്ന് മിനിറ്റുള്ള നെറ്റ്ഫ്ലിക്സ് പ്ലെ ബാക്ക് 2022 ന്റെ ഈ വിഡിയോ സമൂഹമാധ്യമങ്ങളിൽ ഇതിനോടകം വൈറലായി കഴിഞ്ഞു.
