ഓണ്‍ലൈന്‍ മാധ്യമമായ ‘മറുനാടന്‍ മലയാളി’യുടെ ഓഫീസുകളില്‍ അര്‍ധരാത്രി നടന്ന പൊലീസ് റെയ്ഡില്‍ കംപ്യൂട്ടറുകളും ലാപ്‌ടോപ്പുകളും പിടിച്ചെടുത്തു. തിരുവനന്തപുരം പട്ടം ഓഫീസിലെ മുഴുവന്‍ കംപ്യൂട്ടറുകളും പിടിച്ചെടുത്തു. ഓഫീസില്‍ പ്രവേശിക്കുന്നതില്‍ നിന്ന് ജീവനക്കാരെ പൊലീസ് വിലക്കി.
29 കംപ്യൂട്ടറുകള്‍, ലാപ്‌ടോപ്പുകള്‍, ക്യാമറകള്‍ എന്നിവയും പിടിച്ചെടുത്തിട്ടുണ്ട്. മുഴുവന്‍ ജീവനക്കാരുടെയും ലാപ്‌ടോപ്പുകള്‍ പിടിച്ചെടുത്തിട്ടുണ്ട്. അതേസമയം മറുനാടന്‍ മലയാളി സ്ഥാപകന്‍ ഷാജന്‍ സ്‌കറിയയെ കണ്ടെത്താനുള്ള പരിശോധന തുടരുന്നതായി കൊച്ചി പൊലീസ് അറിയിച്ചു.
സംസ്ഥാനത്ത് പലയിടത്തും മറുനാടന്‍ മലയാളിയുടെ ഓഫീസുകളിലും ജീവനക്കാരുടെ വീടുകൡും പരിശോധന നടന്നുവരികയാണ്. കഴിഞ്ഞ ദിവസം മറുനാടന്‍ മലയാളിയിലെ രണ്ട് ജീവനക്കാരുടെ വീടുകളില്‍ റെയ്ഡ് നടന്നിരുന്നു. ഇതിന് പിന്നാലെ മറുനാടന്‍ മലയാളിയുടെ ഓഫീസില്‍ കൊച്ചിയില്‍ നിന്നുള്ള പൊലീസ് സംഘം കഴിഞ്ഞ ദിവസം രാവിലെ പരിശോധന നടത്തുകയും ചെയ്തിരുന്നു.
മറുനാടന്‍ മലയാളിക്കെതിരെയും ഷാജന്‍ സ്‌കറിയയെക്കെതിരെയും പിവി ശ്രീനിജിന്‍ എംഎല്‍എ നല്‍കിയ പരാതിയിലാണ് കൊച്ചി സിറ്റി പൊലീസ് അന്വേഷണം നടത്തുന്നത്. ശ്രീനിജിന്‍ എംഎല്‍എയ്‌ക്കെതിരെ അപകീര്‍ത്തികരമായ പരാമര്‍ശം നടത്തിയതിലാണ് പൊലീസ് ഷാജന്‍ സ്‌കറിയയ്‌ക്കെതിരെ കേസ് എടുത്തിരിക്കുന്നത്.
കേസില്‍ ഷാജന്‍ സ്‌കറിയ മുന്‍കൂര്‍ ജാമ്യത്തിന് ഹര്‍ജി നല്‍കിയിരുന്നെങ്കിലും കോടതി ഹര്‍ജി തള്ളുകയായിരുന്നു.
