കൊച്ചി: കൊല്ലം സുധിയുടെ മരണത്തിനിടയാക്കിയ വാഹനാപകടത്തിൽ പരിക്കേറ്റ് ചികിത്സയിൽ കഴിയുന്ന മഹേഷ് കുഞ്ഞുമോന് ഇന്ന് ശസ്ത്രക്രിയ. കൊച്ചി ഇടപ്പള്ളി അമൃത ആശുപത്രിയിൽ തീവ്രപരിചരണ വിഭാഗത്തിൽ കഴിയുന്ന മഹേഷിന്റെ മുഖത്തിനും പല്ലുകൾക്കുമാണ് അപകടത്തിൽ പരിക്കേറ്റത്. ഏതാണ്ട് ഒൻപത് മണിക്കൂർ നീളുന്ന ശസ്ത്രക്രിയയാണ് ഇന്ന് നടക്കുന്നതെന്നും എല്ലാവരും മഹേഷിനായി പ്രാർത്ഥിക്കണമെന്നും അദ്ദേഹത്തിൻ്റെ സുഹൃത്തുകൾ ഫേസ്ബുക്കിൽ പങ്കുവച്ച കുറിപ്പിൽ പറയുന്നു.
പരിക്കേറ്റ് കൊച്ചി മെഡിക്കൽ ട്രസ്റ്റ് ആശുപത്രിയിൽ ചികിത്സയിൽ കഴിയുന്ന ബിനു അടിമാലി അപകടനില തരണം ചെയ്തതായി ആശുപത്രി വൃത്തങ്ങൾ അറിയിച്ചു. തത്കാലം ബിനു ആശുപത്രിയിൽ ചികിത്സയിൽ തുടരും. അപകടത്തിൽ കാലിൻ്റെ എല്ലിന് പൊട്ടലേറ്റ ഫ്ളവേഴ്സ് ചാനലിലെ ഡ്രൈവർ ഉല്ലാസും ഇവിടെ ചികിത്സയിൽ തുടരുകയാണ്.
തിങ്കളാഴ്ച പുലർച്ചെ നാലരയോടെയാണ് തൃശൂർ കയ്പമംഗലത്ത് വച്ചുണ്ടായ അപകടത്തിൽ നടനും മിമിക്രി കലാകാരനുമായ കൊല്ലം സുധി മരിച്ചത്. വടകരയിൽ നിന്നും പരിപാടി കഴിഞ്ഞ് മടങ്ങിയ സംഘം സഞ്ചരിച്ചിരുന്ന കാർ എതിരെ വന്ന പിക്കപ്പുമായി കൂട്ടിയിടിച്ചായിരുന്നു അപകടം ഉണ്ടായത്. സുധിയുടെ സംസ്കാരം ചൊവ്വാഴ്ച ഉച്ചകഴിഞ്ഞ് രണ്ട് മണിക്ക് കോട്ടയം തോട്ടക്കാട് റീഫോർമിഡ് ആഗ്ലിക്കൻ ചർച്ച് ഓഫ് ഇന്ത്യ ചർച്ച് സെമിത്തേരിയിൽ നടന്നു. ആയിരക്കണക്കിന് ആളുകളാണ് സുധിയെ അവസാനമായി കാണാൻ എത്തിയത്.
