വാഹനാപകടത്തില് മരണപ്പെട്ട കലാകാരന് കൊല്ലം സുധിയുടെ കുടുംബത്തിന് വീടുവെയ്ക്കാന് ഏഴ് സെന്റ് സ്ഥലം ഇഷ്ടദാനമായി നല്കി ബിഷപ്പ് നോബിള് ഫിലിപ്പ് അമ്പലവേലില്. ചങ്ങനാശേരിയിലെ മാടപ്പള്ളിയിലാണ് ഏഴ് സെന്റ് സ്ഥലം നല്കിയിരിക്കുന്നത്. സുധിയുടെ രണ്ട് മക്കളായ റിഥുലിന്റെയും രാഹുലിന്റെയും പേരിലാണ് സ്ഥലം രജിസ്റ്റര് ചെയ്തിരിക്കുന്നത്.
‘എന്റെ കുടുംബ സ്വത്തില് നിന്നും ഏറ്റവും മനോഹരമായ സ്ഥലമാണ് സുധിക്കായി നല്കിയത്. എന്റെ വീട് പണിയുന്നതും ഇതിന് തൊട്ടടുത്താണ്. രജിസ്ട്രേഷന് പൂര്ണമായും കഴിഞ്ഞു. സുധിയുടെ പ്രിയപ്പെട്ട കുഞ്ഞുങ്ങളുടെ പേരിലാണ് സ്ഥലം ഇഷ്ടദാനമായി നല്കിയത്. വീട് പണി ഉടന് തുടങ്ങും,’ ബിഷപ്പ് നോബിള് ഫിലിപ്പ് പറഞ്ഞു.
ആംഗ്ലിക്കന് സഭയുടെ ഡയസിസ് ഓഫ് ട്രാവന്കൂര് ആന്ഡ് കൊച്ചിന് രൂപതയുടെ പതിമൂന്നാമത് മിഷിനറി ബിഷപ്പ് ആണ് നോബിള് ഫിലിപ്പ്. സുധിയുടെ സ്വപ്നമാണ് ഇതിലൂടെ സഫലമാകുന്നതെന്നും എന്നാല് ഇത് കാണാന് അദ്ദേഹം ഇല്ലെന്നും ഭാര്യ രേണു പറഞ്ഞു.
കേരള ഹോം ഡിസൈന്സ് എന്ന ഫേസ്ബുക്ക് കൂട്ടായ്മയിലെ അംഗങ്ങള് ചേര്ന്നാണ് സുധിക്കായി സൗജന്യമായി വീട് നിര്മിച്ചുകൊടുക്കുന്നത്.
