എമിറേറ്റ്സ് എയർലൈൻസിൽ യുവാക്കൾക്ക് തൊഴിലവസരം. കാബിൻ ക്രൂ, ഡേറ്റ അനലിസ്റ്റ്, ഫ്ളയിംഗ് ഇൻസ്ട്രക്ടർ, ടെക്നിക്കൽ മാനേജർ, സീനിയർ സേൽസ് എക്സിക്യൂട്ടിവ്, ഓപറേഷൻസ് മാനേജർ, അഡ്മിനിസ്ട്രേഷൻ അസിസ്റ്റന്റ്, എയർക്രാഫ്റ്റ് ടെക്നീഷ്യൻ, സോഫ്റ്റ്വെയർ എഞ്ചിനിയർ തുടങ്ങിയ തസ്തികളിലായി ഇരുനൂറിലേറെ ഒഴിവുകളാണുള്ളത്.
കാബിൻ ക്രൂവായി പ്രവർത്തിക്കാൻ കുറഞ്ഞത് 160 സെ.മി ഉയരം വേണമെന്നതാണ് എമിറേറ്റ്സിന്റെ നിബന്ധന. ഒരു വർഷം ഹോസ്പിറ്റാലിറ്റി അല്ലെങ്കിൽ കസ്റ്റമർ സർവീസ് പ്രവൃത്തി പരിചയവും അത്യാവശ്യമാണ്. അതേസമയം പ്ലസ് ടു വിദ്യാഭ്യാസമുള്ള ആർക്കും അപേക്ഷിക്കാം. നന്നായി ഇംഗ്ലീഷ് എഴുതാനും സംസാരിക്കാനും അറിഞ്ഞിരിക്കണം. കാബിൻ ക്രൂ യൂണിഫോമിന് വെളിയിൽ കാണുന്ന ശരീരഭാഗത്ത് ടാറ്റു ഉണ്ടായിരിക്കാൻ പാടില്ല എന്നതും നിർബന്ധമാണ്.
10,170 ദിർഹം, അതായത് 2,29,018 രൂപയാണ് പ്രതിമാസ ശമ്പളമായി നൽകുക. നൈറ്റ് സ്റ്റോപ്പുകൾക്ക് ഭക്ഷണത്തിനുള്ള പണവും കമ്പനി നൽകും. ഒപ്പം ഹോട്ടൽ താമസവും വിമാനത്താവളത്തിലേക്ക് പോകാനും തിരിച്ചുമുള്ള യാത്രാ സൗകര്യവും കമ്പനി വാഗ്ദാനം ചെയ്യുന്നുണ്ട്. ദുബായിൽ ഫർണിഷ്ഡ് താമസ സൗകര്യവും ഇതോടൊപ്പം നൽകും. ഒരു വർഷം 30 ദിവസം ലീനും ലഭിക്കും.
മൂന്ന് ഘട്ടങ്ങളിലൂടെയാണ് ജോലിക്കായുള്ള തെരഞ്ഞെടുപ്പ് നടക്കുക. ആദ്യം സിവി അസസ്മെന്റും ശേഷം ഓൺലൈൻ ടെസ്റ്റും, തുടർന്ന് അഭിമുഖവും നടത്തും. ജോലിക്കായി എമിറേറ്റ്സിന്റെ കരിയേഴ്സ് വെബ്സൈറ്റിൽ ഓൺലൈനായി അപേക്ഷ സമർപ്പിക്കാം.
