കുട്ടികൾക്കിടയിൽ മാത്രമല്ല യുവാക്കൾക്കിടയിലും മുതിർന്നവർക്കിടയിലും സൂപ്പർ ഹീറോ സിനിമകളെ കുറിച്ച് പറയുമ്പോഴൊക്കെ സൂപ്പർമാൻ എന്ന പേരാണ് ആദ്യം ഓർമ വരുക. ലോകം മുഴുവൻ ആരാധകരുള്ള ഡിസി കഥാപാത്രമാണ് സൂപ്പർമാൻ. ഈ ലോക പ്രശസ്ത കഥാപാത്രത്തെ ഇതുവരെ നിരവധി അഭിനേതാക്കൾ അവതരിപ്പിച്ചിട്ടുണ്ടെങ്കിലും ഹെൻറി കാവിൽ സൂപ്പർമാൻ ആയി സ്ക്രീനിൽ എത്തുമ്പോൾ അതൊരു മാജിക് ആയി മാറും. എന്നാൽ ഹെൻറി കാവിൽ സുപ്പർമാന്റെ ‘റെഡ് കേപ്പ്’ വീണ്ടുമണിയുന്നത് കാണാൻ കാത്തിരുന്ന ആരാധകരെ നിരാശപ്പെടുത്തുന്ന വാർത്തയാണ് ഇപ്പോൾ പുറത്തുവരുന്നത്.
ഇനി സൂപ്പർമാൻ ആകാൻ ഇല്ലെന്ന് ഹെൻറി കാവിൽ പ്രഖ്യാപിച്ചിരിക്കുകയാണ്. അദ്ദേഹം തന്നെയാണ് സങ്കടകരമായ ഈ വാർത്ത ഇൻസ്റ്റഗ്രാമിലൂടെ അറിയിച്ചത്. ഇത് സംബന്ധിച്ച് ഡിസി ഫിലിംസിന്റെ നേതൃത്വം വഹിക്കുന്ന ജയിംസ് ഗൺ, പീറ്റർ സഫ്രൻ എന്നിവരുമായി ഹെൻറി ചർച്ച നടത്തിയിരുന്നു. ഇതിന് ശേഷമായിരുന്നു ഈ കാര്യം തീരുമാനമായതെന്ന് ഹെൻറി പറയുന്നു. ജയിംസ് ഗണ്ണുമായും പീറ്റർ സഫ്രാനുമായുള്ള ചർച്ച കഴിഞ്ഞു. എല്ലാവരെയും സങ്കടപ്പെടുത്തുന്ന വാർത്തയാണ് പറയാനുള്ളത്. സൂപ്പർമാനായി ഇനി മടങ്ങിവരില്ല -ഹെൻറി കാവിൽ ഇൻസ്റ്റഗ്രാമിൽ കുറിച്ചു.
അതേസമയം ഒക്ടോബറിൽ സ്റ്റുഡിയോ തന്നെ ഹെൻറിയുടെ തിരിച്ചുവരവ് പ്രഖ്യാപിച്ചിരുന്നതാണ്. അതുകൊണ്ട് തന്നെ ഈ വാർത്ത വിഷമകരമാണ്. പക്ഷേ ജീവിതം ഇങ്ങനെയൊക്കെയാണ്. അവരുടെ തീരുമാനത്തെ അംഗീകരിക്കുന്നു. ജയിംസിനും പീറ്ററിനും പുതിയൊരു യൂണിവേഴ്സ് സൃഷ്ടിക്കണം. അവർക്കും സിനിമയുമായി ബന്ധപ്പെട്ട എല്ലാവർക്കും ആശംസകൾ നേരുന്നു. കൂടാതെ ഒപ്പം നിന്ന ആളുകളോട് സൂപ്പർമാൻ ഇപ്പോഴും നിങ്ങൾക്കൊപ്പമുണ്ടെന്ന് ഓർമിപ്പിക്കുന്നു. അയാൾ സൃഷ്ടിച്ച ഉദാഹരണങ്ങളും നിലപാടുകളും എന്നും അവിടെതന്നെ ഉണ്ടാകുമെന്നും ഹെൻറി കൂട്ടിച്ചേർത്തു.
