അമേരിക്കയില് അതിശൈത്യത്തില് മരണസംഖ്യ 60 കടന്നു. തെക്കന് ന്യൂയോര്ക്കിലെ ബഫലോയില് മാത്രം കഴിഞ്ഞ ദിവസം ഹിമപാതത്തില് 25 പേര് മരിച്ചതായാണ് വിവരം. ആറടി ഉയരത്തിലേറെ മഞ്ഞ് മൂടിക്കിടക്കുന്നതിനാല് ഇവിടേക്കുള്ള രക്ഷാപ്രവര്ത്തനം പൂര്ണമായും നിലച്ചിരിക്കുകയാണ്. യുഎസില് 15 ലക്ഷത്തോളം പേര് വൈദ്യുതിയില്ലാതെ ദുരിതത്തിലാണ്.
വൈദ്യുതിയും ഇന്ധനവും മിതമായി ഉപയോഗിക്കണമെന്ന മുന്നറിയിപ്പ് ജനങ്ങള്ക്ക് നല്കിയിട്ടുണ്ട്. 70 ഹൈവേകള് താല്ക്കാലികമായി അടച്ചിരിക്കുകയാണ്. ഒട്ടേറെപ്പേര് വീടിനുള്ളില് കുടുങ്ങിക്കിടക്കുകയാണ്. അതുകൊണ്ട് തന്നെ മഞ്ഞുരുകിയാൽ മാത്രമേ ദുരന്തത്തിന്റെ യാഥാർത്ഥ്യം വ്യക്തമാകുകയുള്ളൂ. ബോംബ് സൈക്ലോണ് എന്നു പേരിട്ട ശീതക്കാറ്റിന്റെ ശക്തി ഏതാനും ദിവസങ്ങൾക്കുള്ളില് ദുർബലമാകുമെന്നാണ് നാഷണല് വെതര് സര്വീസിൻ്റെ വിലയിരുത്തൽ.
