അവധി കഴിഞ്ഞ് ഗള്‍ഫിലേക്ക് തിരിച്ച് പോകുന്ന പ്രവാസിക്ക് ഇറച്ചിയെന്ന് പറഞ്ഞ് കുപ്പിയില്‍ കഞ്ചാവ് നല്‍കി. മലപ്പുറം എടവണ്ണപ്പാറയിലാണ് സംഭവം. സംഭവത്തില്‍ സുഹൃത്ത് അറസ്റ്റിലായി.
ഓമാനൂര്‍ സ്വദേശി പള്ളിപ്പുറായ നീറയില്‍ പികെ ഷമീം (23) ആണ് അറസ്റ്റിലായത്. തിങ്കളാഴ്ച രാത്രി പത്ത് മണിയോടെയാണ് സംഭവം. ഗള്‍ഫിലുള്ള മറ്റൊരു സുഹൃത്തിനെന്ന് പറഞ്ഞാണ് ഷമീം സുഹൃത്തായ ഫൈസലിന് ഇറച്ചിയടങ്ങിയ പെട്ടിയില്‍ കഞ്ചാവ് വെച്ച് നല്‍കിയത്. ലഗേജ് ഒരുക്കുന്നതിനിടെ ഷമീം നല്‍കിയ പെട്ടിയിലെ വസ്തുക്കള്‍ മാറ്റിപായ്ക്ക് ചെയ്യുന്നതിനിടെയാണ് ഫൈസലിന് കഞ്ചാവ് ശ്രദ്ധയില്‍പ്പെടുന്നത്.
പ്ലാസ്റ്റിക് പായ്ക്കില്‍ പ്ലാസ്റ്ററിട്ട് ഒട്ടിച്ച നിലയിലാണ് കഞ്ചാവ് അടങ്ങിയ ബോട്ടില്‍ കണ്ടെത്തിയത്. ഉടന്‍ വാഴക്കാട് സ്‌റ്റേഷനിലെത്തി ഫൈസല്‍ പരാതി നല്‍കുകയായിരുന്നു. സംഭവത്തില്‍ ഉടന്‍ തന്നെ പൊലീസ് ഷമീമിനെ അറസ്റ്റ് ചെയ്തു. സംഭവത്തില്‍ കേസുമായി മുന്നോട്ട് പോകുമെന്നും ഫൈസല്‍ അറിയിച്ചു.
