വിമാനത്താവളങ്ങളിലെ പരിശോധനയിൽ സ്വര്‍ണത്തിനും ലഹരിമരുന്നുകൾക്കും പുറമേ ഭക്ഷണ സാധനങ്ങളും പിടികൂടാറുണ്ട്. വീട്ടില്‍ നിന്ന് തയ്യാറാക്കി കൊണ്ടുപോകുന്ന രുചിയുള്ള ഭക്ഷണ സാധനങ്ങൾ വിമാനത്താവളത്തില്‍ ഉപേക്ഷിച്ച് പോകേണ്ട അവസ്ഥ പലരും നേരിട്ടിട്ടുണ്ടാകും. എന്നാല്‍ അത്തരമൊരു സാഹചര്യത്തെ മനോഹരമായി കൈകാര്യം ചെയ്ത ഒരു യുവാവിന്‍റെ വീഡിയോയാണ് സമൂഹമാധ്യമങ്ങളിൽ വൈറലാകുന്നത്. തായ്ലാന്‍ഡിലെ ഫുകേത് വിമാനത്താവളത്തില്‍ നിന്നുള്ളതാണ് ഈ രസകരമായ കാഴ്ച.
ഹിമാന്‍ഷു ദേവ്ഗണ്‍ എന്ന യുവാവ് ലഗേജിനൊപ്പം കൊണ്ടുപോയ ഗുലാബ് ജാമുൻ ടിൻ വിമാനത്താവളത്തിലെ പരിശോധനയില്‍ കുടുങ്ങി. ഭക്ഷണ വസ്തുകൊണ്ടുപോകാനുള്ള അനുമതി ഇല്ലെന്ന് വിമാനത്താവളത്തിലെ അധികൃതര്‍ ഹിമാൻഷുവിനോട് വിശദമാക്കുകയും ചെയ്തു. എങ്കിലും ഏറെ ആഗ്രഹിച്ച് കൊണ്ടുപോയ ഗുലാബ് ജാമുന്‍ അങ്ങനെ കളഞ്ഞിട്ട് പോരാൻ ആ യുവാവ് തയ്യാറായില്ല. പകരം ടിന്‍ പൊട്ടിച്ച് അതിലെ ഗുലാബ് ജാമുനുകള്‍ സുരക്ഷാ പരിശോധന നടത്തിയ ഉദ്യോഗസ്ഥര്‍ക്ക് തന്നെ വിതരണം ചെയ്യുകയാണ് ഹിമാൻഷു ചെയ്തത്. സുരക്ഷാ ജീവനക്കാര്‍ ഗുലാബ് ജാമുന്‍ കഴിക്കുന്ന വീഡിയോ ദൃശ്യം പുറത്ത് വന്നതോടെ സംഭവം വൈറലായി. ഹിമാൻഷു തന്നെയാണ് വീഡിയോ ഇൻസ്റ്റാഗ്രാം അക്കൗണ്ടിലൂടെ പുറത്ത് വിട്ടത്.
സെപ്തബര്‍ അവസാനവാരമാണ് സംഭവം. യുവാവ് ഇന്‍സ്റ്റഗ്രാമിലൂടെ പുറത്ത് വിട്ട വീഡിയോയ്ക്ക് മികച്ച പ്രതികരണമാണ് ഇപ്പോൾ ലഭിക്കുന്നത്. മധുരമുള്ള പ്രതികാരമെന്നാണ് വീഡിയോയുടെ താഴെ പലരും കമൻ്റിട്ടത്. അതേസമയം സമാനമായ അനുഭവം ലണ്ടന്‍ വിമാനത്താവളത്തില്‍ നേരിട്ടിട്ടുണ്ടെന്നും എന്നാല്‍ ഈ ആശയം അന്ന് തോന്നിയില്ലെന്നുമാണ് ഒരാളുടെ പ്രതികരണം. പാഴ്വസ്തുക്കളുടെ കൂട്ടത്തിലേക്ക് വലിച്ചെറിയുന്നതിനേക്കാള്‍ നല്ലത് ഇതാണ് എന്നാണ് മറ്റൊരാള്‍ അഭിപ്രായപ്പെടുന്നത്. ഫുകേത് വിമാനത്താവളത്തിലെ സുരക്ഷാ ഉദ്യോഗസ്ഥരുടെ മനോഭാവത്തിനും നെറ്റിസണ്‍സ് കയ്യടിക്കുന്നുണ്ട്.
