ഇന്ത്യയില് ജനിച്ചവരെല്ലാം ഹിന്ദുക്കളാണെന്നും തന്നെ ഹിന്ദുവെന്ന് വിളിക്കണമെന്നും കേരള ഗവർണർ ആരിഫ് മുഹമ്മദ് ഖാൻ. കേരള ഹിന്ദൂസ് ഓഫ് നോര്ത്ത് അമേരിക്കയുടെ ഹിന്ദു കോൺക്ലേവ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
തന്നെ അഹിന്ദുവെന്ന് വിളിക്കുന്നത് എന്തിനാണെന്നും അദ്ദേഹം ചോദിച്ചു. സനാതന ധര്മ്മം ഉയര്ത്തിക്കാട്ടിയ സംസ്കാരത്തിന്റെ പേരാണ് ഹിന്ദു. മതത്തിന്റ അടിസ്ഥാനത്തിലല്ല, ഭൂപ്രദേശത്തിന്റെ അടിസ്ഥാനത്തിലാണ് ഹിന്ദു എന്ന് വിളിക്കുന്നതെന്നും ആരിഫ് മുഹമ്മദ് ഖാൻ പറഞ്ഞു.
ബിബിസിയുടെ ഡോക്യൂമെന്ററിയെ കുറിച്ചും അദ്ദേഹം പ്രതികരിച്ചു. എന്തുകൊണ്ടാണ് അവർ ബ്രിട്ടീഷ് അതിക്രമങ്ങളെക്കുറിച്ച് ഒരു ഡോക്യുമെന്ററി നിര്മ്മിക്കാത്തതെന്നായിരുന്നു ഗവർണറുടെ ചോദ്യം. ഇന്ത്യ നന്നായി പ്രവര്ത്തിക്കുന്നു, അതിനാല് ഈ ആളുകള് നിരാശരാണെന്നും ഗവർണർ ഹിന്ദു കോൺക്ലേവിൽ സംസാരിച്ചു.
