അഞ്ചാമത് ആഗോള സുരക്ഷാ ഫോറത്തിന് ഖത്തറിൽ തുടക്കമായി. പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുറഹ്മാൻ അൽ ഥാനി ഫോറം ഉദ്ഘാടനം ചെയ്തു. ‘സംഘർഷം,സഹകരണം,പ്രതിസന്ധി: ആഗോള ക്രമം പുനഃക്രമീകരിക്കുക എന്ന തലക്കെട്ടോട് കൂടിയാണ് അഞ്ചാമത് ലോക സുരക്ഷാ ഫോറം ചേരുന്നത്.
പുതിയ കാലത്തെ സുരക്ഷാ വെല്ലുവിളികളെ നേരിടുന്നത് സംബന്ധിച്ച ചർച്ചകളാണ് ഫോറത്തിൽ നടക്കുക. വിവിധ രാജ്യങ്ങളുടെ മേധാവികൾ, സർക്കാർ പ്രതിനിധികൾ, സാങ്കേതിക വിദഗ്ധർ, സുരക്ഷാ വിദഗ്ധർ, സൈനിക-നീതിന്യായ മേഖലകളിൽ നിന്നുള്ള പ്രമുഖർ എന്നിവർ ഫോറത്തിൽ പങ്കെടുക്കും. ഇവർ വിവിധ സുരക്ഷാ വെല്ലുവിളികളെ കുറിച്ചും അവയുടെ പ്രതിവിധികളെ കുറിച്ചും ചർച്ചചെയ്യും.
യുദ്ധം, സൈബർ കുറ്റകൃത്യങ്ങൾ, സംഘർഷങ്ങൾ, കാലാവസ്ഥാ വ്യതിയാനം എന്നീ വിഷയങ്ങളിൽ വിവിധ രാജ്യങ്ങളുടെ പ്രതിനിധികളും വിദഗ്ധരും സംവദിക്കും. എന്നാൽ അടിസ്ഥാന ആവശ്യങ്ങളായ ഊർജം, മരുന്ന്, വെള്ളം, എന്നിവ രാഷ്ട്രീയവത്ക്കരിക്കുമ്പോൾ ദുർബലമായ രാജ്യങ്ങൾ യുദ്ധക്കെടുതി പോലെയുള്ള ദുരന്തമാണ് നേരിടുന്നത്. ഈ ദുരന്തം മധ്യപൂർവ മേഖലകളിലെ പല രാജ്യങ്ങൾ ഇന്നും അനുഭവിക്കുന്നുണ്ട്. ഇതിന് ദീർഘകാലാടിസ്ഥാനത്തിൽ പരിഹാരം ആവശ്യമാണെന്ന് പ്രധാനമന്ത്രി പറഞ്ഞു.
